ai jazba-e-dil teri tasir nazar aai

ai jazba-e-dil terī tāsīr nazar aa.ī

bantī huī phir apnī taqdīr nazar aa.ī

āzād fazāoñ meñ āzād chaman hogā

kyā ḳhvāb the kyā un kī ta.abīr nazar aa.ī

kyā jaane zamāne ne tasvīr meñ kyā dekhā

mujh ko to musavvir kī tasvīr nazar aa.ī

ham un se jafāoñ kā jī bhar ke gila karte

lekin ye mohabbat kī tahqīr nazar aa.ī

aa.ī thī ajal lekin kuchh is ko takalluf thā

jab aap ke aane meñ tāḳhīr nazar aa.ī

jab chāragaroñ ko bhī yaad aa.ī masīhā kī

muñh taktī huī un ko tadbīr nazar aa.ī

ai jazba-e-dil teri tasir nazar aai

banti hui phir apni taqdir nazar aai

aazad fazaon mein aazad chaman hoga

kya KHwab the kya un ki tabir nazar aai

kya jaane zamane ne taswir mein kya dekha

mujh ko to musawwir ki taswir nazar aai

hum un se jafaon ka ji bhar ke gila karte

lekin ye mohabbat ki tahqir nazar aai

aai thi ajal lekin kuchh is ko takalluf tha

jab aap ke aane mein taKHir nazar aai

jab chaaragaron ko bhi yaad aai masiha ki

munh takti hui un ko tadbir nazar aai