ai junun hath ke chalte hi machal jaunga

ai junūñ haath ke chalte hī machal jā.ūñgā

maiñ garebān se pahle hī nikal jā.ūñgā

vo haTe aañkh ke aage se to bas sūrat-e-aks

maiñ bhī us ā.ina-ḳhāne se nikal jā.ūñgā

mehr tum soḳhta maiñ shīsha-e-ātish hai raqīb

us pe Dāloge tajallī to maiñ jal jā.ūñgā

mujh se kahtā hai mirā dūd-e-jigar sūrat-e-sham.a

dil meñ rokoge to maiñ sar se nikal jā.ūñgā

sham.a-sāñ barsar-e-mahfil na jalā dekh mujhe

phail jā.ūñgā sitamgar jo pighal jā.ūñgā

Thahar ai mehr zarā sub.h-e-shab-e-vasl hai aaj

baam par dhuup chaḌhegī to maiñ Dhal jā.ūñgā

roktā huuñ kabhī shoḳhī se to har tifl-e-sarishk

ro ke kahtā hai abhī ghar se nikal jā.ūñgā

kār-e-imroz ba-fardā ma-guzār ai vaa.iz

aaj is kūche meñ huuñ ḳhuld meñ kal jā.ūñgā

kaun uThā.egā ilāhī shab-e-ġham kī uftād

muñh ko aatā hai kaleja ki nikal jā.ūñgā

le ke āñkhoñ meñ tirā jalva kahāñ jā.egā

ġhair ko dekh ke maiñ aañkh badal jā.ūñgā

har tarah haath meñ hoñ gosha-e-dāman kī tarah

vo sambhāleñge jo mujh ko to sambhal jā.ūñgā

ai junun hath ke chalte hi machal jaunga

main gareban se pahle hi nikal jaunga

wo haTe aankh ke aage se to bas surat-e-aks

main bhi us aaina-KHane se nikal jaunga

mehr tum soKHta main shisha-e-atish hai raqib

us pe Daloge tajalli to main jal jaunga

mujh se kahta hai mera dud-e-jigar surat-e-shama

dil mein rokoge to main sar se nikal jaunga

shama-san barsar-e-mahfil na jala dekh mujhe

phail jaunga sitamgar jo pighal jaunga

Thahar ai mehr zara subh-e-shab-e-wasl hai aaj

baam par dhup chaDhegi to main Dhal jaunga

rokta hun kabhi shoKHi se to har tifl-e-sarishk

ro ke kahta hai abhi ghar se nikal jaunga

kar-e-imroz ba-farda ma-guzar ai waiz

aaj is kuche mein hun KHuld mein kal jaunga

kaun uThaega ilahi shab-e-gham ki uftad

munh ko aata hai kaleja ki nikal jaunga

le ke aankhon mein tera jalwa kahan jaega

ghair ko dekh ke main aankh badal jaunga

har tarah hath mein hon gosha-e-daman ki tarah

wo sambhaalenge jo mujh ko to sambhal jaunga