ai junun tera abhi tak na muqaddar badla

ai junūñ terā abhī tak na muqaddar badlā

shahr badlā na kisī haath kā patthar badlā

zindagī baḳhsh dī jab qatl mujhe kar na sakā

mere qātil ne bahut tez ye ḳhanjar badlā

ho ga.ī rāh-e-junūñ phir kisī sāzish kā shikār

mujh ko lagtā hai har ik miil kā patthar badlā

maiñ to samjhā thā yahāñ fan kī parastish hogī

chand sikkoñ kā uchhalnā thā ki manzar badlā

vo agar raah meñ khultā to koī baat bhī thī

haa.e afsos ki manzil pe pahuñch kar badlā

baat to jab thī ki tum ḳhud ko badalte yaaro

aaj tak tum ne har ik moḌ pe rahbar badlā

mere dāman meñ to ḳhvāboñ ke sivā kuchh bhī na thā

vo jo badlā to bahut soch-samajh kar badlā

rang-o-āhang kalī phuul parinde bhañvre

rut badalte hī har ik shāḳh kā manzar badlā

ai junun tera abhi tak na muqaddar badla

shahr badla na kisi hath ka patthar badla

zindagi baKHsh di jab qatl mujhe kar na saka

mere qatil ne bahut tez ye KHanjar badla

ho gai rah-e-junun phir kisi sazish ka shikar

mujh ko lagta hai har ek mil ka patthar badla

main to samjha tha yahan fan ki parastish hogi

chand sikkon ka uchhalna tha ki manzar badla

wo agar rah mein khulta to koi baat bhi thi

hae afsos ki manzil pe pahunch kar badla

baat to jab thi ki tum KHud ko badalte yaro

aaj tak tum ne har ek moD pe rahbar badla

mere daman mein to KHwabon ke siwa kuchh bhi na tha

wo jo badla to bahut soch-samajh kar badla

rang-o-ahang kali phul parinde bhanwre

rut badalte hi har ek shaKH ka manzar badla