ai KHak-e-watan tere parastar to sab hain

ai ḳhāk-e-vatan tere parastār to sab haiñ

ham hī hue kyoñ ḳhaar gunahgār to sab haiñ

ham bhī haiñ kafan sar pe uThā.e hue ehsāñ

jaldī thī tumheñ varna sar-e-dār to sab haiñ

dekheñge bane shīsha-e-jāñ kis kā nishāna

patthar liye yuuñ darpai-e-āzār to sab haiñ

bāhar na dhuāñ hai na sulagne kā nishāñ hai

andar se bhaḌakte hue angār to sab haiñ

ai shahr-e-ahinsā meñ khaḌe haikal-e-gāñdhī

aa dekh tire shahr meñ ḳhūñḳhār to sab haiñ

hākim bhī haiñ munsif bhī jo kahte haiñ sar-e-bazm

mā'sūm haiñ do-chār ye ġhaddār to sab haiñ

ik nuuh nahīñ jo hameñ kashtī meñ biThā le

varna kisī tūfān ke āsār to sab haiñ

ai KHak-e-watan tere parastar to sab hain

hum hi hue kyon KHar gunahgar to sab hain

hum bhi hain kafan sar pe uThae hue ehsan

jaldi thi tumhein warna sar-e-dar to sab hain

dekhenge bane shisha-e-jaan kis ka nishana

patthar liye yun darpai-e-azar to sab hain

bahar na dhuan hai na sulagne ka nishan hai

andar se bhaDakte hue angar to sab hain

ai shahr-e-ahinsa mein khaDe haikal-e-gandhi

aa dekh tere shahr mein KHunKHar to sab hain

hakim bhi hain munsif bhi jo kahte hain sar-e-bazm

ma'sum hain do-chaar ye ghaddar to sab hain

ek nuh nahin jo hamein kashti mein biTha le

warna kisi tufan ke aasar to sab hain