ai Khaar Khaar-e-hasrat kya kya figar hain hum

ai ḳhaar ḳhār-e-hasrat kyā kyā figār haiñ ham

kyā haal hogā us kā jis dil meñ ḳhaar haiñ ham

har chand dil meñ tere zālim ġhubār haiñ ham

kitne dabe hue haiñ kyā ḳhāksār haiñ ham

kyā jaane kyā dikhā.e kam-baḳht rāz-e-dushman

be-iḳhtiyār ho tum aur be-qarār haiñ ham

vaañ shoḳhiyoñ ne maare nākām kaise kaise

yaañ sādgī se kyā kyā ummīd-vār haiñ ham

ne raḳht mai-kade meñ ne kā'be kā irāda

haiñ dil lagī ke bande yāroñ ke yaar haiñ ham

vaañ sarguzisht-e-dushman vo kah rahe haiñ muñh par

yaañ be-ḳhudī hai is par kyā rāz-dār haiñ ham

saaqī tirī nigāheñ kab tak raheñgī palTī

hai nashsha zāhidoñ ko aur bāda-ḳhvār haiñ ham

kā'ba hai sañg-e-bālīñ zohād-e-ḳhufta dil kā

aur mai-kade ke andar shab-zinda-dār haiñ ham

allāh re zarf-e-dil kā sab kī jagah hai is meñ

be-ġham rahe hai dushman kyā ġham-gusār haiñ ham

ai hashr bach ke chalnā ai charḳh haT ke girnā

hai barq saaya jis kā vo ḳhār-zār haiñ ham

itnī ḳhalish mizha kī ab baḌh ga.ī ki goyā

zaḳhm-e-dil-e-adū meñ ḳhanjar-guzār haiñ ham

kab tak rahegā dushman jaame se apne bāhar

ho aag aag jis se tum vo sharār haiñ ham

dushman kī jeb meñ tum sabr-o-shakeb meñ ham

tum dast-e-kotahī ho pā-e-nigār haiñ ham

vādī-e-justujū se guzrīñ to kyā 'ajab hai

vārafta kaise kaise lail-o-nahār haiñ ham

kyā bāda-e-javānī mard-āzamāñ nasha thā

ab ai 'qalaq' vabāl-e-ḳhvāb-o-ḳhumār haiñ ham

ai KHar KHar-e-hasrat kya kya figar hain hum

kya haal hoga us ka jis dil mein KHar hain hum

har chand dil mein tere zalim ghubar hain hum

kitne dabe hue hain kya KHaksar hain hum

kya jaane kya dikhae kam-baKHt raaz-e-dushman

be-iKHtiyar ho tum aur be-qarar hain hum

wan shoKHiyon ne mare nakaam kaise kaise

yan sadgi se kya kya ummid-war hain hum

ne raKHt mai-kade mein ne ka'be ka irada

hain dil lagi ke bande yaron ke yar hain hum

wan sarguzisht-e-dushman wo kah rahe hain munh par

yan be-KHudi hai is par kya raaz-dar hain hum

saqi teri nigahen kab tak rahengi palTi

hai nashsha zahidon ko aur baada-KHwar hain hum

ka'ba hai sang-e-baalin zohad-e-KHufta dil ka

aur mai-kade ke andar shab-zinda-dar hain hum

allah re zarf-e-dil ka sab ki jagah hai is mein

be-gham rahe hai dushman kya gham-gusar hain hum

ai hashr bach ke chalna ai charKH haT ke girna

hai barq saya jis ka wo KHar-zar hain hum

itni KHalish mizha ki ab baDh gai ki goya

zaKHm-e-dil-e-adu mein KHanjar-guzar hain hum

kab tak rahega dushman jame se apne bahar

ho aag aag jis se tum wo sharar hain hum

dushman ki jeb mein tum sabr-o-shakeb mein hum

tum dast-e-kotahi ho pa-e-nigar hain hum

wadi-e-justuju se guzrin to kya 'ajab hai

warafta kaise kaise lail-o-nahaar hain hum

kya baada-e-jawani mard-azaman nasha tha

ab ai 'qalaq' wabaal-e-KHwab-o-KHumar hain hum