ai KHuda ajab hai tera jahan mera dil yahan pe laga nahin

ai ḳhudā ajab hai tirā jahāñ mirā dil yahāñ pe lagā nahīñ

jahāñ koī ahl-e-vafā nahīñ kisī lab pe harf-e-duā nahīñ

baḌā shor thā tire shahr kā so guzār aa.e haiñ din vahāñ

vo sakūñ ki jis kī talāsh hai tire shahr meñ bhī milā nahīñ

ye jo hashr barpā hai har taraf to bas is kā hai yahī ik sabab

hai laboñ pe nām-e-ḳhudā magar kisī dil meñ ḳhauf-e-ḳhudā nahīñ

jo hañsī hai lab pe sajī huī to ye sirf zabt kā farq hai

mire dil meñ bhī vahī zaḳhm haiñ mirā haal tujh se judā nahīñ

ye jo dasht-e-dil meñ haiñ raunaqeñ ye tirī atā ke tufail haiñ

diyā zaḳhm jo vo harā rahā jo diyā jalā vo bujhā nahīñ

ai ḳhudā ajab hai tirī razā koī bhed is kā na pā sakā

ki milā to mil gayā be-talab jise māñgte the milā nahīñ

vo jo harf-e-haq thā likhā gayā kisī shaam ḳhuun se ret par

hai gavāh mauja-e-vaqt bhī ki vo harf us se miTā nahīñ

ai KHuda ajab hai tera jahan mera dil yahan pe laga nahin

jahan koi ahl-e-wafa nahin kisi lab pe harf-e-dua nahin

baDa shor tha tere shahr ka so guzar aae hain din wahan

wo sakun ki jis ki talash hai tere shahr mein bhi mila nahin

ye jo hashr barpa hai har taraf to bas is ka hai yahi ek sabab

hai labon pe nam-e-KHuda magar kisi dil mein KHauf-e-KHuda nahin

jo hansi hai lab pe saji hui to ye sirf zabt ka farq hai

mere dil mein bhi wahi zaKHm hain mera haal tujh se juda nahin

ye jo dasht-e-dil mein hain raunaqen ye teri ata ke tufail hain

diya zaKHm jo wo hara raha jo diya jala wo bujha nahin

ai KHuda ajab hai teri raza koi bhed is ka na pa saka

ki mila to mil gaya be-talab jise mangte the mila nahin

wo jo harf-e-haq tha likha gaya kisi sham KHun se ret par

hai gawah mauja-e-waqt bhi ki wo harf us se miTa nahin