ai KHuda-e-wahm main thak gaya ye nizam sochte sochte

ai ḳhudā-e-vahm maiñ thak gayā ye nizām sochte sochte

tirī raah dekhte dekhte tirā naam sochte sochte

tū ḳhayāl hai ki sarā.e hai jahāñ aa gayā to maiñ bas gayā

mujhe rah ga.e mire jism ke dar-o-bām sochte sochte

na yahāñ kā huuñ na vahāñ kā huuñ to kahāñ kā huuñ mujhe ye batā

ye maiñ kis maqām pe aa gayā vo maqām sochte sochte

kahāñ kaun samt se aa ga.ī mire vāste ye sadā-e-qum

kahāñ kaun samt meñ chal diye mire gaam sochte sochte

yahī sochnā to azaab hai mirī zaat kā mirī zaat par

ki shurūa sab mire ho ga.e haiñ tamām sochte sochte

ai KHuda-e-wahm main thak gaya ye nizam sochte sochte

teri rah dekhte dekhte tera nam sochte sochte

tu KHayal hai ki sarae hai jahan aa gaya to main bas gaya

mujhe rah gae mere jism ke dar-o-baam sochte sochte

na yahan ka hun na wahan ka hun to kahan ka hun mujhe ye bata

ye main kis maqam pe aa gaya wo maqam sochte sochte

kahan kaun samt se aa gai mere waste ye sada-e-qum

kahan kaun samt mein chal diye mere gam sochte sochte

yahi sochna to azab hai meri zat ka meri zat par

ki shurua sab mere ho gae hain tamam sochte sochte