اے مسیحا اثر دعا کا ہے

اے مسیحا اثر دعا کا ہے

اور چرچا تری دوا کا ہے

پاؤں جمتے نہیں ہیں وحشت میں

عشق گویا سفر خلا کا ہے

تم جو محسوس کر رہے ہو جمود

مرحلہ یہ بھی ارتقا کا ہے

ختم کو اختتام کہتے ہو

یہ تو آغاز ابتدا کا ہے

ہو رہا ہے جو خود بہ خود معدوم

نقش وہ کس گریز پا کا ہے

یار یہ عشق ہے خیال رہے

اور پھر عشق بھی بلا کا ہے

ریت کے تم بنا رہے ہو مکان

یہ علاقہ مگر ہوا کا ہے

وحی اترتی نہیں مگر عاصمؔ

ہم سے کچھ رابطہ خدا کا ہے