ai mere zaKHm-e-dil-nawaz gham ko KHushi banae ja

ai mire zaḳhm-e-dil-navāz ġham ko ḳhushī banā.e jā

ā.ankhoñ se ḳhuuñ bahā.e jā hoñToñ se muskurā.e jā

jaane se pahle bevafā shab ko sahar banā.e jā

dil ko bujhā ke kyā chalā sham.a ko bhī bujhā.e jā

saañs kā taar TuuT jaa.e TuuTe na taar aah kā

ek hī lai pe gaa.e jā ek hī dhun bajā.e jā

hukm-e-talab ke muntazir shauq kī aabrū na kho

sar ko qadam banā ke chal ā.ankhoñ se be-bulā.e jā

le vo davā-e-talḳh hai jis kā asar hai ḳhush-gavār

piine meñ muñh banā.e jā dil meñ maze uThā.e jā

joshish-e-chashm-e-ashk-bār muft na rakh karam kā baar

merī lagī to bujh chukī apnī lagī bujhā.e jā

manzil-e-be-ḳhudī-e-shauq hadd-e-nazar se duur hai

pīchhe palaT ke bhī na dekh aage qadam baḌhā.e jā

ik hama-tan hai pā-e-nāz ik hama-tan sar-e-niyāz

ye to chalan jahāñ kā hai jitnā de dabā.e jā

zarf-e-sharāb tere paas zurūf-e-surūr mere paas

dil to nahīñ ba-qadr-e-jām dekh na muñh pilā.e jā

donoñ haiñ nāz-e-dilbarī zid meñ hai jin kī aur lutf

ek taraf lagā.e jā ek taraf bujhā.e jā

chāñd meñ gum chakor ḳhud chāñd kahīñ chhupā huā

apnī talāsh ḳhatm kar us kā pata lagā.e jā

'ārzū' us se kah do saaf ġham kā asar hai der-pā

jald hañsī na aa.egī aur abhī gudgudā.e jā

ai mere zaKHm-e-dil-nawaz gham ko KHushi banae ja

aaankhon se KHun bahae ja honTon se muskurae ja

jaane se pahle bewafa shab ko sahar banae ja

dil ko bujha ke kya chala shama ko bhi bujhae ja

sans ka tar TuT jae TuTe na tar aah ka

ek hi lai pe gae ja ek hi dhun bajae ja

hukm-e-talab ke muntazir shauq ki aabru na kho

sar ko qadam bana ke chal aaankhon se be-bulae ja

le wo dawa-e-talKH hai jis ka asar hai KHush-gawar

pine mein munh banae ja dil mein maze uThae ja

joshish-e-chashm-e-ashk-bar muft na rakh karam ka bar

meri lagi to bujh chuki apni lagi bujhae ja

manzil-e-be-KHudi-e-shauq hadd-e-nazar se dur hai

pichhe palaT ke bhi na dekh aage qadam baDhae ja

ek hama-tan hai pa-e-naz ek hama-tan sar-e-niyaz

ye to chalan jahan ka hai jitna de dabae ja

zarf-e-sharab tere pas zuruf-e-surur mere pas

dil to nahin ba-qadr-e-jam dekh na munh pilae ja

donon hain naz-e-dilbari zid mein hai jin ki aur lutf

ek taraf lagae ja ek taraf bujhae ja

chand mein gum chakor KHud chand kahin chhupa hua

apni talash KHatm kar us ka pata lagae ja

'arzu' us se kah do saf gham ka asar hai der-pa

jald hansi na aaegi aur abhi gudgudae ja