ai meri jaan hamesha ho teri jaan ki KHair

ai mirī jaan hamesha ho tirī jaan kī ḳhair

nāzukī daur-e-balā, husn ke sāmān kī ḳhair

raat din shaam sahar pahar ghaḌī pal saa.at

māñgte jaatī hai ham ko tirī aan aan kī ḳhair

mehñdī choTī ho sivā.ī ho chamak peTī kī

umr choTī kī baḌī zulf-e-pareshān kī ḳhair

be-tarah bojh se jhumkoñ ke jhuke paḌte haiñ

kiijo allāh tū un jhumkoñ kī aur kaan kī ḳhair

paan khāyā hai to is vaqt bhī lāzim hai yahī

ek bosa hameñ diije lab-o-dandān kī ḳhair

aañkh uThā dekhiye aur dekh ke hañs bhī diije

apne kājal kī zakāt aur misī-o-pān kī ḳhair

pahle jis aan tumhārī ne liyā dil ham se

ab talak māñgte haiñ dil se ham us aan kī ḳhair

kyā ġhazab nikle hai ban-Than ke vo kāfir yaaro

aaj hotī nazar aatī nahīñ īmān kī ḳhair

jitne mahbūb parī-zād haiñ duniyā meñ 'nazīr'

sab ke allāh kare husn kī aur jaan kī ḳhair

ai meri jaan hamesha ho teri jaan ki KHair

nazuki daur-e-bala, husn ke saman ki KHair

raat din sham sahar pahar ghaDi pal saat

mangte jati hai hum ko teri aan aan ki KHair

mehndi choTi ho siwai ho chamak peTi ki

umr choTi ki baDi zulf-e-pareshan ki KHair

be-tarah bojh se jhumkon ke jhuke paDte hain

kijo allah tu un jhumkon ki aur kan ki KHair

pan khaya hai to is waqt bhi lazim hai yahi

ek bosa hamein dije lab-o-dandan ki KHair

aankh uTha dekhiye aur dekh ke hans bhi dije

apne kajal ki zakat aur misi-o-pan ki KHair

pahle jis aan tumhaari ne liya dil hum se

ab talak mangte hain dil se hum us aan ki KHair

kya ghazab nikle hai ban-Than ke wo kafir yaro

aaj hoti nazar aati nahin iman ki KHair

jitne mahbub pari-zad hain duniya mein 'nazir'

sab ke allah kare husn ki aur jaan ki KHair