ai rabb-e-kainat mujhe le panah mein

ai rabb-e-kā.ināt mujhe le panāh meñ

bahtā hī jā rahā huuñ ḳhalīj-e-gunāh meñ

tasvīr-e-shab meñ hikmat-e-hākim to dekhiye

khiltā hai nūr-e-māh libās-e-siyāh meñ

un kī galī meñ aa to ga.e haiñ magar ye dil

kartā hai zid ki aa.iye un kī nigāh meñ

be-sūd hai ye 'ilm-o-zihānat ye falsafa

samjheñ agar na farq safed-o-siyāh meñ

le kar purānī saañs ko detī hai phir na.ī

quvvat kahāñ se aa.ī hai aisī gayāh meñ

'sā.in' ġhazal pe daad milī hai to ḳhush na ho

kuchh aur hī chhupā hai rafīqoñ kī vaah meñ

ai rabb-e-kainat mujhe le panah mein

bahta hi ja raha hun KHalij-e-gunah mein

taswir-e-shab mein hikmat-e-hakim to dekhiye

khilta hai nur-e-mah libas-e-siyah mein

un ki gali mein aa to gae hain magar ye dil

karta hai zid ki aaiye un ki nigah mein

be-sud hai ye 'ilm-o-zihanat ye falsafa

samjhen agar na farq safed-o-siyah mein

le kar purani sans ko deti hai phir nai

quwwat kahan se aai hai aisi gayah mein

'sain' ghazal pe dad mili hai to KHush na ho

kuchh aur hi chhupa hai rafiqon ki wah mein