ai ranj-e-agahi koi chaara to hoga na

ai ranj-e-āgahī koī chāra to hogā nā

chal ḳhush na rah sakeñge guzārā to hogā nā

ye aarzū bhī vaqt ke dhāre meñ bah ga.ī

ab naañ sahī kabhī vo hamārā to hogā nā

jaatī hai jo matā-e-dil-o-jāñ to kyā malāl

ye 'ishq kī dukāñ hai ḳhasāra to hogā nā

har aan jis kā zikr hai us be-niyāz ne

bhūle se merā naam pukārā to hogā nā

maiñ zād-e-rah ke taur pe bas ḳhvāb laa.ī huuñ

ai ham-safar tujhe ye gavārā to hogā nā

kyā ajnabī baneñge agar phir kabhī mile

kyā baat bhī na hogī ishāra to hogā nā

karnā karānā chhoḌ zabānī hī saath de

tinke kā ho agarche sahārā to hogā nā

ai ranj-e-agahi koi chaara to hoga na

chal KHush na rah sakenge guzara to hoga na

ye aarzu bhi waqt ke dhaare mein bah gai

ab nan sahi kabhi wo hamara to hoga na

jati hai jo mata-e-dil-o-jaan to kya malal

ye 'ishq ki dukan hai KHasara to hoga na

har aan jis ka zikr hai us be-niyaz ne

bhule se mera nam pukara to hoga na

main zad-e-rah ke taur pe bas KHwab lai hun

ai ham-safar tujhe ye gawara to hoga na

kya ajnabi banenge agar phir kabhi mile

kya baat bhi na hogi ishaara to hoga na

karna karana chhoD zabani hi sath de

tinke ka ho agarche sahaara to hoga na