ai saqi-e-mah-wash gham-e-dauran nahin uThta

ai sāqi-e-mah-vash ġham-e-daurāñ nahīñ uThtā

darvesh ke hujre se ye mehmāñ nahīñ uThtā

kahte the ki hai bār-e-do-ālam bhī koī chiiz

dekhā hai to ab bār-e-garebāñ nahīñ uThtā

kyā mere safīne hī kī dariyā ko khaTak thī

kyā baat hai ab kyuuñ koī tūfāñ nahīñ uThtā

kis naqsh-e-qadam par hai jhukā roz-e-azal se

kis vahm meñ sajde se bayābāñ nahīñ uThtā

be-himmat-e-mardāna masāfat nahīñ kaTtī

be-azm-e-musammam qadam āsāñ nahīñ uThtā

yuuñ uThtī haiñ añgḌā.ī ko vo marmarīñ bāñheñ

jaise ki 'adam' taḳht-e-sulaimāñ nahīñ uThtā

ai saqi-e-mah-wash gham-e-dauran nahin uThta

darwesh ke hujre se ye mehman nahin uThta

kahte the ki hai bar-e-do-alam bhi koi chiz

dekha hai to ab bar-e-gareban nahin uThta

kya mere safine hi ki dariya ko khaTak thi

kya baat hai ab kyun koi tufan nahin uThta

kis naqsh-e-qadam par hai jhuka roz-e-azal se

kis wahm mein sajde se bayaban nahin uThta

be-himmat-e-mardana masafat nahin kaTti

be-azm-e-musammam qadam aasan nahin uThta

yun uThti hain angDai ko wo marmarin banhen

jaise ki 'adam' taKHt-e-sulaiman nahin uThta