ai sanam jis ne tujhe chand si surat di hai

ai sanam jis ne tujhe chāñd sī sūrat dī hai

usī allāh ne mujh ko bhī mohabbat dī hai

teġh be-āb hai ne bāzū-e-qātil kamzor

kuchh girāñ-jānī hai kuchh maut ne fursat dī hai

is qadar kis ke liye ye jañg-o-jadal ai gardūñ

na nishāñ mujh ko diyā hai na tū naubat dī hai

saañp ke kaaTe kī lahreñ haiñ shab-o-roz ātīñ

kākul-e-yār ke saude ne aziyyat dī hai

aa.ī iksīr ġhanī dil nahīñ rakhtī aisā

ḳhāksārī nahīñ dī hai mujhe daulat dī hai

sham.a kā apne fatīla nahīñ kis raat jalā

amal-e-hub kī bahut ham ne bhī dāvat dī hai

jism ko zer zamīñ bhī vahī pahuñchā degā

ruuh ko jis ne falak sair kī tāqat dī hai

furqat-e-yār meñ ro ro ke basar kartā huuñ

zindagānī mujhe kyā dī hai musībat dī hai

yād-e-mahbūb farāmosh na hove ai dil

husn-e-niyyat ne mujhe ishq se ne.amat dī hai

gosh paidā kiye sunñe ko tirā zikr-e-jamāl

dekhne ko tire, āñkhoñ meñ basārat dī hai

lutf-e-dil-bastagī-e-āshiq-e-shaidā ko na pūchh

do jahāñ se is asīrī ne farāġhat dī hai

kamar-e-yār ke mazmūn ko bāñdho 'ātish'

zulf-e-ḳhūbāñ sī rasā tum ko tabī.at dī hai

ai sanam jis ne tujhe chand si surat di hai

usi allah ne mujh ko bhi mohabbat di hai

tegh be-ab hai ne bazu-e-qatil kamzor

kuchh giran-jaani hai kuchh maut ne fursat di hai

is qadar kis ke liye ye jang-o-jadal ai gardun

na nishan mujh ko diya hai na tu naubat di hai

sanp ke kaTe ki lahren hain shab-o-roz aatin

kakul-e-yar ke saude ne aziyyat di hai

aai iksir ghani dil nahin rakhti aisa

KHaksari nahin di hai mujhe daulat di hai

shama ka apne fatila nahin kis raat jala

amal-e-hub ki bahut hum ne bhi dawat di hai

jism ko zer zamin bhi wahi pahuncha dega

ruh ko jis ne falak sair ki taqat di hai

furqat-e-yar mein ro ro ke basar karta hun

zindagani mujhe kya di hai musibat di hai

yaad-e-mahbub faramosh na howe ai dil

husn-e-niyyat ne mujhe ishq se neamat di hai

gosh paida kiye sunne ko tera zikr-e-jamal

dekhne ko tire, aankhon mein basarat di hai

lutf-e-dil-bastagi-e-ashiq-e-shaida ko na puchh

do jahan se is asiri ne faraghat di hai

kamar-e-yar ke mazmun ko bandho 'atish'

zulf-e-KHuban si rasa tum ko tabiat di hai