ai sanam mujhko kisi se bhi sarokar nahin ba-KHuda tere siwa

ai sanam mujh ko kisī se bhī sarokār nahīñ ba-ḳhudā tere sivā

dīn-o-īmāñ se bhī matlab mujhe zinhār nahīñ maiñ to banda huuñ tirā

raas aa.ī na use baaġh kī bhī āb-o-havā āriza kuchh na ghaTā

achchhī hone kī bas ab nargis-e-bīmār nahīñ us kā hāfiz hai ḳhudā

ye vahī dil hai ki māshūqoñ kā thā madd-e-nazar thā hujūm aaTh pahar

ab vahī dil hai ki koī bhī ḳharīdār nahīñ aisā bāzār girā

nabz sāqit hī huī āñkheñ bhī haiñ chhat se lagīñ hai dam-e-bāz-pasīñ

zindagī ke mire ab koī bhī āsār nahīñ yuuñ to qādir hai ḳhudā

kaisā kaisā tirī furqat meñ huā haal mirā tū ne pūchhā na zarā

tujh sā be-rahm koī ai but-e-ayyār nahīñ aur agar hai to batā

apne begāne hue dost bane dushman-e-jāñ ḳhuuñ kā pyāsā hai jahāñ

ai sanam tū hī mirī shakl se bezār nahīñ ek aalam hai ḳhafā

'akbar'-e-ḳhasta se kah do ki vo tayyār rahe ham kamar bāñdh chuke

ab yahāñ rahne kā mauqa koī zinhār nahīñ qāfila aage baḌhā

ai sanam mujh ko kisi se bhi sarokar nahin ba-KHuda tere siwa

din-o-iman se bhi matlab mujhe zinhaar nahin main to banda hun tera

ras aai na use bagh ki bhi aab-o-hawa aariza kuchh na ghaTa

achchhi hone ki bas ab nargis-e-bimar nahin us ka hafiz hai KHuda

ye wahi dil hai ki mashuqon ka tha madd-e-nazar tha hujum aaTh pahar

ab wahi dil hai ki koi bhi KHaridar nahin aisa bazar gira

nabz saqit hi hui aankhen bhi hain chhat se lagin hai dam-e-baz-pasin

zindagi ke mere ab koi bhi aasar nahin yun to qadir hai KHuda

kaisa kaisa teri furqat mein hua haal mera tu ne puchha na zara

tujh sa be-rahm koi ai but-e-ayyar nahin aur agar hai to bata

apne begane hue dost bane dushman-e-jaan KHun ka pyasa hai jahan

ai sanam tu hi meri shakl se bezar nahin ek aalam hai KHafa

'akbar'-e-KHasta se kah do ki wo tayyar rahe hum kamar bandh chuke

ab yahan rahne ka mauqa koi zinhaar nahin qafila aage baDha