ai sang-e-rah aabla-pai na de mujhe

ai sañg-e-rāh ābla-pā.ī na de mujhe

aisā na ho ki raah sujhā.ī na de mujhe

sat.h-e-shu.ūr par hai mire shor is qadar

ab naġhma-e-zamīr sunā.ī na de mujhe

insāniyat kā jām-e-jahāñ paash paash ho

allāh mere aisī ḳhudā.ī na de mujhe

rañgīniyāñ shabāb kī itnī haiñ dil-fareb

bāloñ pe aatī dhuup dikhā.ī na de mujhe

tark-e-ta.alluqāt pe isrār thā tujhe

ab to mirī vafā kī duhā.ī na de mujhe

be-bāl-o-par huuñ raas na aa.egī ye fazā

'sānī' qafas se apne rihā.ī na de mujhe

ai sang-e-rah aabla-pai na de mujhe

aisa na ho ki rah sujhai na de mujhe

sath-e-shuur par hai mere shor is qadar

ab naghma-e-zamir sunai na de mujhe

insaniyat ka jam-e-jahan pash pash ho

allah mere aisi KHudai na de mujhe

ranginiyan shabab ki itni hain dil-fareb

baalon pe aati dhup dikhai na de mujhe

tark-e-talluqat pe israr tha tujhe

ab to meri wafa ki duhai na de mujhe

be-baal-o-par hun ras na aaegi ye faza

'sani' qafas se apne rihai na de mujhe