ai shab hijr kahin teri sahar hai ki nahin

ai shab hijr kahīñ terī sahar hai ki nahīñ

nāla-e-nīm-shabī tujh meñ asar hai ki nahīñ

jaan par apnī maiñ khelā huuñ judā.ī meñ tirī

be-ḳhabar tujh ko bhī kuchh us kī ḳhabar hai ki nahīñ

ek muddat huī ham vasf-e-kamar karte haiñ

par ye ma.alūm nahīñ us ke kamar hai ki nahīñ

rakh na sozan ko zarā dekh to le ai jarrāh

qābil-e-baḳhiya mirā zaḳhm-e-jigar hai ki nahīñ

kyā ḳhush aa.ī hai dilā manzil-e-hastī tujh ko

sach batā yaañ se tirā azm-e-safar hai ki nahīñ

to jo be-parda ho muñh ġhair ko dikhlātā hai

paas merā bhī kuchh ai rashk-e-qamar hai ki nahīñ

dekh tū ai but-e-be-mehr tirī furqat meñ

har-bun-e-mūe mirā dīda-e-tar hai ki nahīñ

us ke dar par hī jo rahtā huuñ maiñ din raat paḌā

mujh se jhunjhlā ke kahe hai tire ghar hai ki nahīñ

'mus.hafī' us kī galī meñ jo tū jaatā hai sadā

apnī badnāmī kā kuchh tujh ko bhī Dar hai ki nahīñ

ai shab hijr kahin teri sahar hai ki nahin

nala-e-nim-shabi tujh mein asar hai ki nahin

jaan par apni main khela hun judai mein teri

be-KHabar tujh ko bhi kuchh us ki KHabar hai ki nahin

ek muddat hui hum wasf-e-kamar karte hain

par ye malum nahin us ke kamar hai ki nahin

rakh na sozan ko zara dekh to le ai jarrah

qabil-e-baKHiya mera zaKHm-e-jigar hai ki nahin

kya KHush aai hai dila manzil-e-hasti tujh ko

sach bata yan se tera azm-e-safar hai ki nahin

to jo be-parda ho munh ghair ko dikhlata hai

pas mera bhi kuchh ai rashk-e-qamar hai ki nahin

dekh tu ai but-e-be-mehr teri furqat mein

har-bun-e-mue mera dida-e-tar hai ki nahin

us ke dar par hi jo rahta hun main din raat paDa

mujh se jhunjhla ke kahe hai tere ghar hai ki nahin

'mushafi' us ki gali mein jo tu jata hai sada

apni badnami ka kuchh tujh ko bhi Dar hai ki nahin