ai shahr-e-KHirad ki taza hawa wahshat ka koi inam chale

ai shahr-e-ḳhirad kī taaza havā vahshat kā koī in'ām chale

kuchh harf-e-malāmat aur chaleñ kuchh vird-e-zabāñ dushnām chale

ik garmī-e-jast-e-farāsat hai ik vahshat-e-pā-e-mohabbat hai

jis paañv kī tāqat jī meñ ho vo saath mire do-gām chale

aise ġham-e-tūfāñ meñ aksar ik zid ko ik zid kaaT ga.ī

shāyad ki nahañg-āsār havā kuchh ab ke harīf-e-dām chale

jo baat sukūt-e-lab tak hai us se na ulajh ai jazba-e-dil

kuchh arz-e-hunar kī laag rahe kuchh mere junūñ kā kaam chale

ai vādī-e-ġham ye mauj-e-havā ik sāz-e-rāh-e-sapārāñ hai

ruktī huī rau ḳhvāboñ kī koī yā sub.h chale yā shaam chale

tujh ko to havāoñ kī zad meñ kuchh raat ga.e tak jalnā hai

ik ham ki tire jalte jalte bastī se charāġh-e-shām chale

jo naqsh-e-kitāb-e-shātir hai us chaal se āḳhir kyā chaliye

khele to zarā dushvār chale haare bhī to kuchh din naam chale

kyā naam batā.eñ ham us kā nāmoñ kī bahut rusvā.ī hai

kuchh ab ke bahār-e-tāza-nafas ik daur-e-vafā be-nām chale

ye aap kahāñ 'madnī'-sāhib kuchh ḳhair to hai mai-ḳhāna hai

kyā koī kitāb-e-mai dekhī do ek to daur-e-jām chale

ai shahr-e-KHirad ki taza hawa wahshat ka koi in'am chale

kuchh harf-e-malamat aur chalen kuchh wird-e-zaban dushnam chale

ek garmi-e-jast-e-farasat hai ek wahshat-e-pa-e-mohabbat hai

jis panw ki taqat ji mein ho wo sath mere do-gam chale

aise gham-e-tufan mein aksar ek zid ko ek zid kaT gai

shayad ki nahang-asar hawa kuchh ab ke harif-e-dam chale

jo baat sukut-e-lab tak hai us se na ulajh ai jazba-e-dil

kuchh arz-e-hunar ki lag rahe kuchh mere junun ka kaam chale

ai wadi-e-gham ye mauj-e-hawa ek saz-e-rah-e-saparan hai

rukti hui rau KHwabon ki koi ya subh chale ya sham chale

tujh ko to hawaon ki zad mein kuchh raat gae tak jalna hai

ek hum ki tere jalte jalte basti se charagh-e-sham chale

jo naqsh-e-kitab-e-shatir hai us chaal se aaKHir kya chaliye

khele to zara dushwar chale haare bhi to kuchh din nam chale

kya nam bataen hum us ka namon ki bahut ruswai hai

kuchh ab ke bahaar-e-taza-nafas ek daur-e-wafa be-nam chale

ye aap kahan 'madni'-sahib kuchh KHair to hai mai-KHana hai

kya koi kitab-e-mai dekhi do ek to daur-e-jam chale