ai shahr-e-sitam-pesha bata kis ko sada dun

ai shahr-e-sitam-pesha batā kis ko sadā duuñ

ab kaun rahā hai jise paiġhām-e-vafā duuñ

shāmil mirī sāñsoñ meñ hai sadiyoñ kī aziyyat

aa gardish-e-daurāñ maiñ tujhe bhī to duā duuñ

ashkoñ ke guhar bhī to nahīñ paas mire ab

maiñ soch rahī huuñ ġham-e-daurāñ tujhe kyā duuñ

Dartī huuñ bikhar jā.egī ḳhākistar-e-jāñ bhī

bujhte hue sho.aloñ maiñ tumheñ kaise havā duuñ

vo log jo sargarm-e-takallum haiñ sar-e-bazm

kaise unheñ ādāb takallum ke sikhā duuñ

ai raat sarāboñ ke sivā kuchh na milegā

maiñ din ke ujāle meñ agar sham.a jalā duuñ

'gulnār' sar-e-shāḳh-e-chaman lāla-o-gul ko

de de vo ijāzat to mahakne kī adā duuñ

ai shahr-e-sitam-pesha bata kis ko sada dun

ab kaun raha hai jise paigham-e-wafa dun

shamil meri sanson mein hai sadiyon ki aziyyat

aa gardish-e-dauran main tujhe bhi to dua dun

ashkon ke guhar bhi to nahin pas mere ab

main soch rahi hun gham-e-dauran tujhe kya dun

Darti hun bikhar jaegi KHakistar-e-jaan bhi

bujhte hue shoalon main tumhein kaise hawa dun

wo log jo sargarm-e-takallum hain sar-e-bazm

kaise unhen aadab takallum ke sikha dun

ai raat sarabon ke siwa kuchh na milega

main din ke ujale mein agar shama jala dun

'gulnar' sar-e-shaKH-e-chaman lala-o-gul ko

de de wo ijazat to mahakne ki ada dun