ai wasl kuchh yahan na hua kuchh nahin hua

ai vasl kuchh yahāñ na huā kuchh nahīñ huā

us jism kī maiñ jaañ na huā kuchh nahīñ huā

tū aaj mere ghar meñ jo mehmāñ hai iid hai

tū ghar kā mezbāñ na huā kuchh nahīñ huā

kholī to hai zabān magar is kī kyā bisāt

maiñ zahr kī dukāñ na huā kuchh nahīñ huā

kyā ek kārobār thā vo rabt-e-jism-o-jāñ

koī bhī rā.egāñ na huā kuchh nahīñ huā

kitnā jalā huā huuñ bas ab kyā batā.ūñ maiñ

aalam dhuāñ dhuāñ na huā kuchh nahīñ huā

dekhā thā jab ki pahle-pahal us ne ā.īna

us vaqt maiñ vahāñ na huā kuchh nahīñ huā

vo ik jamāl jalvā-fishāñ hai zamīñ zamīñ

maiñ tā-ba-āsmāñ na huā kuchh nahīñ huā

maiñ ne bas ik nigāh meñ tai kar liyā tujhe

tū rañg-e-bekarāñ na huā kuchh nahīñ huā

gum ho ke jaan tū mirī āġhosh-e-zāt meñ

be-nām-o-be-nishāñ na huā kuchh nahīñ huā

har koī darmiyān hai ai mājrā-farosh

maiñ apne darmiyāñ na huā kuchh nahīñ huā

ai wasl kuchh yahan na hua kuchh nahin hua

us jism ki main jaan na hua kuchh nahin hua

tu aaj mere ghar mein jo mehman hai id hai

tu ghar ka mezban na hua kuchh nahin hua

kholi to hai zaban magar is ki kya bisat

main zahr ki dukan na hua kuchh nahin hua

kya ek karobar tha wo rabt-e-jism-o-jaan

koi bhi raegan na hua kuchh nahin hua

kitna jala hua hun bas ab kya bataun main

aalam dhuan dhuan na hua kuchh nahin hua

dekha tha jab ki pahle-pahal us ne aaina

us waqt main wahan na hua kuchh nahin hua

wo ek jamal jalwa-fishan hai zamin zamin

main ta-ba-asman na hua kuchh nahin hua

main ne bas ek nigah mein tai kar liya tujhe

tu rang-e-bekaran na hua kuchh nahin hua

gum ho ke jaan tu meri aaghosh-e-zat mein

be-nam-o-be-nishan na hua kuchh nahin hua

har koi darmiyan hai ai majra-farosh

main apne darmiyan na hua kuchh nahin hua