aisa bhi nahin bhule se KHwahish hi nahin ki

aisā bhī nahīñ bhūle se ḳhvāhish hī nahīñ kī

paane kī use shauq se koshish hī nahīñ kī

us ne tabhī nirvān ke qābil nahīñ jaanā

us but kī dil-o-jāñ se parastish hī nahīñ kī

barsā vo mire jote hue khet pe ik baar

bādal ne palaT kar kabhī bārish hī nahīñ kī

us husn-e-mujassam ko shikāyat hai ki maiñ ne

ġhairoñ kī tarah us kī satā.ish hī nahīñ kī

maiñ sāmne us shaḳhs ke dil khol ke rakhtā

ahvāl kī us ne kabhī pursish hī nahīñ kī

haq par mire hone meñ koī shak to nahīñ thā

is martaba kyā jaan ke nālish hī nahīñ kī

masnad mujhe darbār meñ miltī bhī to kaise

mil kar kisī darbārī se sāzish hī nahīñ kī

shāyad ki ḳhushāmad se qalam rok na paatā

nāhaq kisī hākim ne navāzish hī nahīñ kī

aisa bhi nahin bhule se KHwahish hi nahin ki

pane ki use shauq se koshish hi nahin ki

us ne tabhi nirwan ke qabil nahin jaana

us but ki dil-o-jaan se parastish hi nahin ki

barsa wo mere jote hue khet pe ek bar

baadal ne palaT kar kabhi barish hi nahin ki

us husn-e-mujassam ko shikayat hai ki main ne

ghairon ki tarah us ki sataish hi nahin ki

main samne us shaKHs ke dil khol ke rakhta

ahwal ki us ne kabhi pursish hi nahin ki

haq par mere hone mein koi shak to nahin tha

is martaba kya jaan ke nalish hi nahin ki

masnad mujhe darbar mein milti bhi to kaise

mil kar kisi darbari se sazish hi nahin ki

shayad ki KHushamad se qalam rok na pata

nahaq kisi hakim ne nawazish hi nahin ki