aise hasin ke ishq mein hai be-qarar dil

aise hasīñ ke ishq meñ hai be-qarār dil

sadqe haiñ jis kī ek adā par hazār dil

jab māñgte haiñ sab sanam-e-rozgār dil

itne kahāñ se lā.ūñ maiñ parvardigār dil

bezār zindagī se hai lail-o-nahār dil

jis roz se huzūr ko kartā hai pyaar dil

kyā sochte ho us ko nishāna batāo tum

hai nāvak-e-mizha kā tumhāre shikār dil

bauchhār ho rahī hai jo tīr-e-nigāh kī

siina hai chāk-chāk hamārā figār dil

ġhamza ko duuñ karishma-e-nāz-o-adā ko duuñ

kis tarah ek dil ke baneñ tiin chaar dil

kyā kyā uThā.īñ hijr-e-sanam meñ musībateñ

barsoñ rahā hai aaTh pahar be-qarār dil

dafn is meñ kushta ho ke huiiñ kitnī hasrateñ

madfan banā hai siina to lauh-e-mazār dil

zāhid ḳhayāl-e-yār to har-dam hai jāguzīñ

kyūñkar karūñ maiñ hūr-e-jināñ par nisār dil

karne lagā hai mujh se bahut kaj-adā.iyāñ

ab but huā hai jaise tirā rāzdār dil

Thahrā na ek dam kabhī soz-e-firāq meñ

sīmāb-vār apnā rahā be-qarār dil

dekhā koī hasīn to kyā kyā phaḌak uThā

bechain ho gayā mirā be-iḳhtiyār dil

bhūlā hai terī yaad butoñ ke ḳhayāl meñ

aisā diyā thā kyoñ mujhe parvardigār dil

aao jo mere ghar meñ to sau jaan se karūñ

chitvan par aañkh sadqe adā par nisār dil

hotā nahīñ hai eid ko bhī ġham ġhalat 'diler'

yārān-e-raftagāñ kā banā sogvār dil

aise hasin ke ishq mein hai be-qarar dil

sadqe hain jis ki ek ada par hazar dil

jab mangte hain sab sanam-e-rozgar dil

itne kahan se laun main parwardigar dil

bezar zindagi se hai lail-o-nahaar dil

jis roz se huzur ko karta hai pyar dil

kya sochte ho us ko nishana batao tum

hai nawak-e-mizha ka tumhaare shikar dil

bauchhaar ho rahi hai jo tir-e-nigah ki

sina hai chaak-chaak hamara figar dil

ghamza ko dun karishma-e-naz-o-ada ko dun

kis tarah ek dil ke banen tin chaar dil

kya kya uThain hijr-e-sanam mein musibaten

barson raha hai aaTh pahar be-qarar dil

dafn is mein kushta ho ke huin kitni hasraten

madfan bana hai sina to lauh-e-mazar dil

zahid KHayal-e-yar to har-dam hai jaguzin

kyunkar karun main hur-e-jinan par nisar dil

karne laga hai mujh se bahut kaj-adaiyan

ab but hua hai jaise tera raazdar dil

Thahra na ek dam kabhi soz-e-firaq mein

simab-war apna raha be-qarar dil

dekha koi hasin to kya kya phaDak uTha

bechain ho gaya mera be-iKHtiyar dil

bhula hai teri yaad buton ke KHayal mein

aisa diya tha kyon mujhe parwardigar dil

aao jo mere ghar mein to sau jaan se karun

chitwan par aankh sadqe ada par nisar dil

hota nahin hai eid ko bhi gham ghalat 'diler'

yaran-e-raftagan ka bana sogwar dil