aise lamhe par hamein qurban ho jaana paDa

aise lamhe par hameñ qurbān ho jaanā paḌā

ek hī laġhzish meñ jab insān ho jaanā paḌā

be-niyāzāna guzarne par uThīñ jab uñgliyāñ

mujh ko apne ahd kī pahchān ho jaanā paḌā

zindagī jab nā-shanāsī kī sazā bantī ga.ī

rābtoñ kī ḳhud mujhe mīzān ho jaanā paḌā

reza reza apnā paikar ik na.ī tartīb meñ

canvas par dekh kar hairān ho jaanā paḌā

sā.atoñ kī āhanī zanjīr meñ jakḌī huī

saañs kī tartīb par qurbān ho jaanā paḌā

vo to lamhoñ ke sisakte dā.eroñ meñ qaid hai

jis ko apne aap se anjān ho jaanā paḌā

ik pahelī kī tarah nā-faham the ham bhī 'zahīr'

aap kī ḳhātir magar āsān ho jaanā paḌā

aise lamhe par hamein qurban ho jaana paDa

ek hi laghzish mein jab insan ho jaana paDa

be-niyazana guzarne par uThin jab ungliyan

mujh ko apne ahd ki pahchan ho jaana paDa

zindagi jab na-shanasi ki saza banti gai

rabton ki KHud mujhe mizan ho jaana paDa

reza reza apna paikar ek nai tartib mein

canwas par dekh kar hairan ho jaana paDa

saaton ki aahani zanjir mein jakDi hui

sans ki tartib par qurban ho jaana paDa

wo to lamhon ke sisakte daeron mein qaid hai

jis ko apne aap se anjaan ho jaana paDa

ek paheli ki tarah na-faham the hum bhi 'zahir'

aap ki KHatir magar aasan ho jaana paDa