aise mantar bhi ho gae ijad

aise mantar bhī ho ga.e ījād

laxmī bhī sarasvatī bhī milī

vo jo ham-manzilī nahīñ bhūle

un ko taufīq-e-ham-ravī bhī milī

dushmanoñ hī se dushmanī bhī milī

aur dar-parda rahbarī bhī milī

dost hī jaan ko bhī aate rahe

dostoñ hī se zindagī bhī milī

apne pyāroñ se pyaar ham ko to thā

rañj paa.e magar ḳhushī bhī milī

justujū kī mazīd baḳhshī dekh

gul jo DhūñDā bakāvlī bhī milī

zindagī thī faqat nasheb-o-farāz

yā kabhī sat.h-e-mustavī bhī milī

mūslā-dhār ne.amateñ barsīñ

un meñ kotāh-dāmanī bhī milī

aise mantar bhi ho gae ijad

laxmi bhi saraswati bhi mili

wo jo ham-manzili nahin bhule

un ko taufiq-e-ham-rawi bhi mili

dushmanon hi se dushmani bhi mili

aur dar-parda rahbari bhi mili

dost hi jaan ko bhi aate rahe

doston hi se zindagi bhi mili

apne pyaron se pyar hum ko to tha

ranj pae magar KHushi bhi mili

justuju ki mazid baKHshi dekh

gul jo DhunDa bakawli bhi mili

zindagi thi faqat nasheb-o-faraaz

ya kabhi sath-e-mustawi bhi mili

musla-dhaar neamaten barsin

un mein kotah-damani bhi mili