aisi bhi kahan be-sar-o-samani hui hai

aisī bhī kahāñ be-sar-o-sāmānī huī hai

jo sab ko mujhe dekh ke hairānī huī hai

dil meñ to tirī yaad thī ik buuñd lahū kī

āñkhoñ meñ jo aa.ī to yahī paanī huī hai

qulzum kā hai ezaaz ki tahdārī kī har mauj

is zulf-e-girah-gīr kī dīvānī huī hai

kyā DhūñDne niklī hai kisī qais ko pāgal

is darja jo ye bād-e-bayābānī huī hai

āseb-zada haiñ dar-o-dīvar-e-shab-o-roz

kis darja mah o saal kī vīrānī huī hai

bo.e haiñ bahut chashm-e-tamannā meñ yahāñ ḳhvāb

tab jā ke zamīñ dil kī ye bārānī huī hai

aisi bhi kahan be-sar-o-samani hui hai

jo sab ko mujhe dekh ke hairani hui hai

dil mein to teri yaad thi ek bund lahu ki

aankhon mein jo aai to yahi pani hui hai

qulzum ka hai ezaz ki tahdari ki har mauj

is zulf-e-girah-gir ki diwani hui hai

kya DhunDne nikli hai kisi qais ko pagal

is darja jo ye baad-e-bayabani hui hai

aaseb-zada hain dar-o-diwar-e-shab-o-roz

kis darja mah o sal ki virani hui hai

boe hain bahut chashm-e-tamanna mein yahan KHwab

tab ja ke zamin dil ki ye barani hui hai