ajab hai rang-e-chaman ja-ba-ja udasi hai

ajab hai rañg-e-chaman jā-ba-jā udāsī hai

mahak udāsī hai bād-e-sabā udāsī hai

nahīñ nahīñ ye bhalā kis ne kah diyā tum se

meñ Thīk-Thāk huuñ haañ bas zarā udāsī hai

maiñ mubtalā kabhī hotā nahīñ udāsī meñ

maiñ vo huuñ jis meñ ki ḳhud mubtalā udāsī hai

tabīb ne koī tafsīl to batā.ī nahīñ

bahut jo pūchhā to itnā kahā udāsī hai

gudāz qalb ḳhushī se bhalā kisī ko milā

aziim vasf hī insān kā udāsī hai

shadīd dard kī rū hai ravāñ rag-e-jāñ meñ

balā kā rañj hai be-intihā udāsī hai

firāq meñ bhī udāsī baḌe kamāl kī thī

pas-e-visāl to is se sivā udāsī hai

tumheñ mile jo ḳhazāne tumheñ mubārak hoñ

mirī kamā.ī to ye be-bahā udāsī hai

chhupā rahī ho magar chhup nahīñ rahī mirī jaañ

jhalak rahī hai jo zer-e-qabā udāsī hai

mujhe masā.il-e-kaun-o-makāñ se kyā matlab

mirā to sab se baḌā mas.ala udāsī hai

falak hai sar pe udāsī kī tarah phailā huā

zamīñ nahīñ hai mire zer-e-pā udāsī hai

ġhazal ke bhes meñ aa.ī hai aaj mahram-e-dard

suḳhan kī oḌhe hue hai ridā udāsī hai

ajiib tarah kī hālat hai merī be-ahvāl

ajiib tarah kī be mājrā udāsī hai

vo kaif-e-hijr meñ ab ġhāliban sharīk nahīñ

ka.ī dinoñ se bahut be-mazā udāsī hai

vo kah rahe the ki shā.ir ġhazab kā hai 'irfān'

har ek sher meñ kyā ġham hai kyā udāsī hai

ajab hai rang-e-chaman ja-ba-ja udasi hai

mahak udasi hai baad-e-saba udasi hai

nahin nahin ye bhala kis ne kah diya tum se

mein Thik-Thak hun han bas zara udasi hai

main mubtala kabhi hota nahin udasi mein

main wo hun jis mein ki KHud mubtala udasi hai

tabib ne koi tafsil to batai nahin

bahut jo puchha to itna kaha udasi hai

gudaz qalb KHushi se bhala kisi ko mila

azim wasf hi insan ka udasi hai

shadid dard ki ru hai rawan rag-e-jaan mein

bala ka ranj hai be-intiha udasi hai

firaq mein bhi udasi baDe kamal ki thi

pas-e-visal to is se siwa udasi hai

tumhein mile jo KHazane tumhein mubarak hon

meri kamai to ye be-baha udasi hai

chhupa rahi ho magar chhup nahin rahi meri jaan

jhalak rahi hai jo zer-e-qaba udasi hai

mujhe masail-e-kaun-o-makan se kya matlab

mera to sab se baDa masala udasi hai

falak hai sar pe udasi ki tarah phaila hua

zamin nahin hai mere zer-e-pa udasi hai

ghazal ke bhes mein aai hai aaj mahram-e-dard

suKHan ki oDhe hue hai rida udasi hai

ajib tarah ki haalat hai meri be-ahwal

ajib tarah ki be majra udasi hai

wo kaif-e-hijr mein ab ghaaliban sharik nahin

kai dinon se bahut be-maza udasi hai

wo kah rahe the ki shair ghazab ka hai 'irfan'

har ek sher mein kya gham hai kya udasi hai