ajab hua ki mujhe maut se hayat hui

ajab huā ki mujhe maut se hayāt huī

jab us kī zaat meñ tahlīl merī zaat huī

har ek lafz sitāre meñ ho gayā tabdīl

tamām raat mirī āsmāñ se baat huī

sajā diye the muñDeroñ pe be-qarār charāġh

darūn-e-rāt mujhe aur ek raat huī

harī rutoñ meñ hameñ shāḳh shāḳh dekhnā tum

vo phuul phuul khilā maiñ bhī paat paat huī

maiñ saañp sīḌhī se pātāl tak girā.ī ga.ī

maiñ jaan hī na sakī jiit thī ki maat huī

tavīl uḌaan ne mādūm kar diyā hai vajūd

maiñ be-sabāt thī kuchh aur be-sabāt huī

tamām hone na hone kī sā.atoñ meñ 'sahar'

vo ek shakl mujhe puurī kā.enāt huī

ajab hua ki mujhe maut se hayat hui

jab us ki zat mein tahlil meri zat hui

har ek lafz sitare mein ho gaya tabdil

tamam raat meri aasman se baat hui

saja diye the munDeron pe be-qarar charagh

darun-e-raat mujhe aur ek raat hui

hari ruton mein hamein shaKH shaKH dekhna tum

wo phul phul khila main bhi pat pat hui

main sanp siDhi se patal tak girai gai

main jaan hi na saki jit thi ki mat hui

tawil uDan ne madum kar diya hai wajud

main be-sabaat thi kuchh aur be-sabaat hui

tamam hone na hone ki saaton mein 'sahar'

wo ek shakl mujhe puri kaenat hui