ajab jauban hai gul par aamad-e-fasl-e-bahaari hai

ajab jauban hai gul par āmad-e-fasl-e-bahārī hai

shitāb aa sāqiyā gul-rū ki terī yādgārī hai

rihā kartā hai sayyād-e-sitamgar mausam-e-gul meñ

asīrān-e-qafas lo tum se ab ruḳhsat hamārī hai

kisī pahlū nahīñ ārām aatā tere āshiq ko

dil-e-muztar taḌaptā hai nihāyat be-qarārī hai

safā.ī dekhte hī dil phaḌak jaatā hai bismil kā

are jallād tere teġh kī kyā āb-dārī hai

dilā ab to firāq-e-yār meñ ye haal hai apnā

ki sar zaanū pe hai aur ḳhūn-e-dil āñkhoñ se jaarī hai

ilāhī ḳhair kiijo kuchh abhī se dil dhaḌaktā hai

sunā hai manzil avval kī pahlī raat bhārī hai

'rasā' mahv-e-fasāhat dost kyā dushman bhī haiñ saare

zamāne meñ tire tarz-e-suḳhan kī yādgārī hai

ajab jauban hai gul par aamad-e-fasl-e-bahaari hai

shitab aa saqiya gul-ru ki teri yaadgari hai

riha karta hai sayyaad-e-sitamgar mausam-e-gul mein

asiran-e-qafas lo tum se ab ruKHsat hamari hai

kisi pahlu nahin aaram aata tere aashiq ko

dil-e-muztar taDapta hai nihayat be-qarari hai

safai dekhte hi dil phaDak jata hai bismil ka

are jallad tere tegh ki kya aab-dari hai

dila ab to firaq-e-yar mein ye haal hai apna

ki sar zanu pe hai aur KHun-e-dil aankhon se jari hai

ilahi KHair kijo kuchh abhi se dil dhaDakta hai

suna hai manzil awwal ki pahli raat bhaari hai

'rasa' mahw-e-fasahat dost kya dushman bhi hain sare

zamane mein tere tarz-e-suKHan ki yaadgari hai