ajab koi zor-e-bayan ho gaya hun

ajab koī zor-e-bayāñ ho gayā huuñ

rukā huuñ to phir se ravāñ ho gayā huuñ

bahut gard uḌne lagī mere pīchhe

akelā hī maiñ kārvāñ ho gayā huuñ

sabhī mere hone pe ḳhush ho rahe haiñ

mujhe bhī batāo kahāñ ho gayā huuñ

kināre nikal aa.e haiñ mere andar

ba-zāhir to maiñ be-karāñ ho gayā huuñ

kisī kaam se shādmāñ hote hote

kisī baat se bad-gumāñ ho gayā huuñ

kisī ke liye vāqi.a huuñ yahāñ par

kisī ke liye dāstāñ ho gayā huuñ

maiñ bāhar to mahfūz thā har tarah se

ghar aayā huuñ aur be-amāñ ho gayā huuñ

jo paḌne lagī thī bahut merī qīmat

huuñ sharminda aur rā.egāñ ho gayā huuñ

'zafar' kaam luuñ ab ishāroñ se kab tak

zabāñ toḌ kar be-zabāñ ho gayā huuñ

ajab koi zor-e-bayan ho gaya hun

ruka hun to phir se rawan ho gaya hun

bahut gard uDne lagi mere pichhe

akela hi main karwan ho gaya hun

sabhi mere hone pe KHush ho rahe hain

mujhe bhi batao kahan ho gaya hun

kinare nikal aae hain mere andar

ba-zahir to main be-karan ho gaya hun

kisi kaam se shadman hote hote

kisi baat se bad-guman ho gaya hun

kisi ke liye waqia hun yahan par

kisi ke liye dastan ho gaya hun

main bahar to mahfuz tha har tarah se

ghar aaya hun aur be-aman ho gaya hun

jo paDne lagi thi bahut meri qimat

hun sharminda aur raegan ho gaya hun

'zafar' kaam lun ab ishaaron se kab tak

zaban toD kar be-zaban ho gaya hun