ajab pagal hai dil kar-e-jahan bani mein rahta hai

ajab pāgal hai dil kār-e-jahāñ baanī meñ rahtā hai

ḳhudā jab dekhtā hai ḳhud bhī hairānī meñ rahtā hai

maiñ vo TuuTā huā taarā jise mahfil na raas aa.ī

maiñ vo shola jo shab bhar aañkh ke paanī meñ rahtā hai

koī aisā nahīñ miltā jo mujh meñ Duub kar dekhe

mire ġham ko jo mere dil kī vīrānī meñ rahtā hai

hazāroñ bijliyāñ TūTīñ nasheman bhī jalā lekin

koī to hai jo is ghar kī nigahbānī meñ rahtā hai

ḳhudā aur nāḳhudā donoñ ḳhajil haiñ haal par mere

maiñ vo tinkā huuñ jo āġhosh-e-tuġhyānī meñ rahtā hai

rumūz-e-mumlikat yā rab ḳhirad samjhe yā tū jaane

junūñ merā to shauq-e-chāk-dāmānī meñ rahtā hai

ġhazal likhne se kyā hogā 'mujībī' kuchh qasīde likh

sharaf sunte haiñ ab tarz-e-sanā-ḳhvānī meñ rahtā hai

ajab pagal hai dil kar-e-jahan bani mein rahta hai

KHuda jab dekhta hai KHud bhi hairani mein rahta hai

main wo TuTa hua tara jise mahfil na ras aai

main wo shola jo shab bhar aankh ke pani mein rahta hai

koi aisa nahin milta jo mujh mein Dub kar dekhe

mere gham ko jo mere dil ki virani mein rahta hai

hazaron bijliyan TuTin nasheman bhi jala lekin

koi to hai jo is ghar ki nigahbani mein rahta hai

KHuda aur naKHuda donon KHajil hain haal par mere

main wo tinka hun jo aaghosh-e-tughyani mein rahta hai

rumuz-e-mumlikat ya rab KHirad samjhe ya tu jaane

junun mera to shauq-e-chaak-damani mein rahta hai

ghazal likhne se kya hoga 'mujibi' kuchh qaside likh

sharaf sunte hain ab tarz-e-sana-KHwani mein rahta hai