ajab talash-e-musalsal ka iKHtitam hua

ajab talāsh-e-musalsal kā iḳhtitām huā

husūl-e-rizq huā bhī to zer-e-dām huā

thā intizār manāeñge mil ke dīvālī

na tum hī lauT ke aa.e na vaqt-e-shām huā

har ek shahr kā me.aar muḳhtalif dekhā

kahīñ pe sar kahīñ pagḌī kā ehtirām huā

zarā sī umr adāvat kī lambī fehristeñ

ajiib qarz virāsat meñ mere naam huā

na thī zamīn meñ vus.at mirī nazar jaisī

badan thakā bhī nahīñ aur safar tamām huā

ham apne saath liye phir rahe haiñ pachhtāvā

ḳhayāl lauT ke jaane kā gaam gaam huā

ajab talash-e-musalsal ka iKHtitam hua

husul-e-rizq hua bhi to zer-e-dam hua

tha intizar manaenge mil ke diwali

na tum hi lauT ke aae na waqt-e-sham hua

har ek shahr ka mear muKHtalif dekha

kahin pe sar kahin pagDi ka ehtiram hua

zara si umr adawat ki lambi fehristen

ajib qarz wirasat mein mere nam hua

na thi zamin mein wusat meri nazar jaisi

badan thaka bhi nahin aur safar tamam hua

hum apne sath liye phir rahe hain pachhtawa

KHayal lauT ke jaane ka gam gam hua