ajab visal ki taqrib-e-ru-numai nahin

'ajab visāl ki taqrīb-e-rū-numā.ī nahīñ

phir aisā hijr ki jis meñ kahīñ judā.ī nahīñ

libās-e-jism to maujūd hai abhī tujh par

barahna honā mirī jaan be-hayā.ī nahīñ

vo ik ġhazal thī magar ruuh kī zamīn meñ thī

hamāre ḳhāk-zada qāfiyoñ meñ aa.ī nahīñ

ziyāda din nahīñ Tiktā kisī kī naukrī meñ

ye dil kā tarz-e-ta'alluq hai bevafā.ī nahīñ

maiñ intihāoñ se āġhāz kar rahā huuñ ye 'ishq

so is safar meñ qadam koī ibtidā.ī nahīñ

badan to bhīgtā rahtā hai bārishoñ meñ bahut

magar mirī badaniyyat abhī nahā.ī nahīñ

alag alag hī adā kījiye ye dogānā

agar namāz-e-jamā’at meñ ham-navā.ī nahīñ

na bhīñch yuuñ ki chaTaḳh jaa.e shīsha-e-āġhosh

giraft Dhīlī bhī rakhne meñ kuchh burā.ī nahīñ

nashist-e-ḳhāk se uTThā nahīñ kabhī 'ehsās'

vo uTh ke masdar-e-rūhāniyat se aa.ī nahīñ

'ajab visal ki taqrib-e-ru-numai nahin

phir aisa hijr ki jis mein kahin judai nahin

libas-e-jism to maujud hai abhi tujh par

barahna hona meri jaan be-hayai nahin

wo ek ghazal thi magar ruh ki zamin mein thi

hamare KHak-zada qafiyon mein aai nahin

ziyaada din nahin Tikta kisi ki naukri mein

ye dil ka tarz-e-ta'alluq hai bewafai nahin

main intihaon se aaghaz kar raha hun ye 'ishq

so is safar mein qadam koi ibtidai nahin

badan to bhigta rahta hai barishon mein bahut

magar meri badaniyyat abhi nahai nahin

alag alag hi ada kijiye ye dogana

agar namaz-e-jama’at mein ham-nawai nahin

na bhinch yun ki chaTaKH jae shisha-e-aghosh

giraft Dhili bhi rakhne mein kuchh burai nahin

nashist-e-KHak se uTTha nahin kabhi 'ehsas'

wo uTh ke masdar-e-ruhaniyat se aai nahin