ajib daur hai ahl-e-hunar nahin aate

ajiib daur hai ahl-e-hunar nahīñ aate

pidar kā ilm liye ab pisar nahīñ aate

havā ke jhoñke bhī le kar ḳhabar nahīñ aate

jo ghar se jaate haiñ phir lauT kar nahīñ aate

hazār shāḳh-e-tamannā kī dekh-bhāl karo

ye shāḳh vo hai ki jis par samar nahīñ aate

samajh sakeñge na merī guzar-basar ko huzūr

sunahre taḳht se jab tak utar nahīñ aate

ham un kī samt chaleñ kis tarah se mīloñ-mīl

hamārī samt jo bālisht-bhar nahīñ aate

janāb-e-shaiḳh ke hujre se duur hī rahiye

farishte aate haiñ is meñ bashar nahīñ aate

savāl hī na thā dushman kī fath-yābī kā

hamārī saf meñ munāfiq agar nahīñ aate

na jaane kis kī nazar lag ga.ī zamāne ko

ki phuul chehre shagufta nazar nahīñ aate

vo din ga.e ki koī ḳhvāb ham ko taḌpā.e

ab aise ḳhvāb hameñ rāt-bhar nahīñ aate

ham un kī raah meñ āñkheñ bichhā.eñ kyuuñ 'māhir'

jo āsmāñ se sar-e-rah-guzar nahīñ aate

ajib daur hai ahl-e-hunar nahin aate

pidar ka ilm liye ab pisar nahin aate

hawa ke jhonke bhi le kar KHabar nahin aate

jo ghar se jate hain phir lauT kar nahin aate

hazar shaKH-e-tamanna ki dekh-bhaal karo

ye shaKH wo hai ki jis par samar nahin aate

samajh sakenge na meri guzar-basar ko huzur

sunahre taKHt se jab tak utar nahin aate

hum un ki samt chalen kis tarah se milon-mil

hamari samt jo baalisht-bhar nahin aate

janab-e-shaiKH ke hujre se dur hi rahiye

farishte aate hain is mein bashar nahin aate

sawal hi na tha dushman ki fath-yabi ka

hamari saf mein munafiq agar nahin aate

na jaane kis ki nazar lag gai zamane ko

ki phul chehre shagufta nazar nahin aate

wo din gae ki koi KHwab hum ko taDpae

ab aise KHwab hamein raat-bhar nahin aate

hum un ki rah mein aankhen bichhaen kyun 'mahir'

jo aasman se sar-e-rah-guzar nahin aate