ajib jumbish-e-lab hai KHitab bhi na kare

'ajīb jumbish-e-lab hai ḳhitāb bhī na kare

savāl kar ke mujhe lā-javāb bhī na kare

vo mere qurb meñ duurī kī chāshnī rakkhe

mire liye mirā jiinā 'azāb bhī na kare

kabhī kabhī mujhe sairāb kar ke ḳhush kar de

hamesha gumrah-e-sehr-e-sarāb bhī na kare

'ajīb barzaḳh-e-ulfat meñ mujh ko rakkhā hai

ki vo ḳhafā bhī rahe aur itaab bhī na kare

vo intizār dikhā.e is ehtiyāt ke saath

ki merī āñkhoñ ko mahrūm-e-ḳhvāb bhī na kare

vo raat bhar kuchh is andāz se kare bāteñ

mujhe jagā.e bhī nīñdeñ ḳharāb bhī na kare

har ek she'r meñ 'āzar' nuqūsh haiñ us ke

magar vo ḳhud ko kabhī be-naqāb bhī na kare

'ajib jumbish-e-lab hai KHitab bhi na kare

sawal kar ke mujhe la-jawab bhi na kare

wo mere qurb mein duri ki chashni rakkhe

mere liye mera jina 'azab bhi na kare

kabhi kabhi mujhe sairab kar ke KHush kar de

hamesha gumrah-e-sehr-e-sarab bhi na kare

'ajib barzaKH-e-ulfat mein mujh ko rakkha hai

ki wo KHafa bhi rahe aur itab bhi na kare

wo intizar dikhae is ehtiyat ke sath

ki meri aankhon ko mahrum-e-KHwab bhi na kare

wo raat bhar kuchh is andaz se kare baaten

mujhe jagae bhi ninden KHarab bhi na kare

har ek she'r mein 'azar' nuqush hain us ke

magar wo KHud ko kabhi be-naqab bhi na kare