ajib log hain gul karke zindagi ke charagh

ajiib log haiñ gul karke zindagī ke charāġh

jalā.e baiThe haiñ apne gharoñ meñ ghī ke charāġh

bhaTak rahe haiñ añdheroñ meñ mehr-o-māh-o-nujūm

har ek samt farozāñ haiñ tīrgī ke charāġh

nazar nazar meñ diye hasratoñ ke larzāñ haiñ

qadam qadam pe haiñ raqsāñ fasurdagī ke charāġh

chaman meñ zāġh-o-zaġhan kī bapā vo shorish hai

ki chhin ga.e haiñ anādil se naġhmagī ke charāġh

bhaḌak uThī hai diloñ meñ vo ātish-e-nafrat

ki jal uThe haiñ laboñ tak pe tishnagī ke charāġh

ye soch leñ ki uḌaa.e hañsī na bād-e-ḳhizāñ

kareñ na ahl-e-chaman gul shaguftagī ke charāġh

unhīñ ke ghar meñ añdherā hai ḳhuun se jin ke

faroġh-kash haiñ shabistān-e-ḳhvājgī ke charāġh

muhīt ḳhāna-e-jāñ par hai abr-e-mahrūmī

jalāo ḳhūn-e-tamannā se zindagī ke charāġh

uThī haiñ āñdhiyāñ iblīsiyat kī vo 'at.har'

laraz rahe haiñ ḳhudā.ī meñ bandagī ke charāġh

ajib log hain gul karke zindagi ke charagh

jalae baiThe hain apne gharon mein ghi ke charagh

bhaTak rahe hain andheron mein mehr-o-mah-o-nujum

har ek samt farozan hain tirgi ke charagh

nazar nazar mein diye hasraton ke larzan hain

qadam qadam pe hain raqsan fasurdagi ke charagh

chaman mein zagh-o-zaghan ki bapa wo shorish hai

ki chhin gae hain anadil se naghmagi ke charagh

bhaDak uThi hai dilon mein wo aatish-e-nafrat

ki jal uThe hain labon tak pe tishnagi ke charagh

ye soch len ki uDae hansi na baad-e-KHizan

karen na ahl-e-chaman gul shaguftagi ke charagh

unhin ke ghar mein andhera hai KHun se jin ke

farogh-kash hain shabistan-e-KHwajgi ke charagh

muhit KHana-e-jaan par hai abr-e-mahrumi

jalao KHun-e-tamanna se zindagi ke charagh

uThi hain aandhiyan iblisiyat ki wo 'athar'

laraz rahe hain KHudai mein bandagi ke charagh