ajib manzar-e-baala-e-baam hota hai

ajiib manzar-e-bālā-e-bām hotā hai

jab āshkār vo māh-e-tamām hotā hai

hirās-e-shab, asar-e-zo.af, ḳhauf-e-rāhzanāñ

musāfiroñ pe girāñ vaqt-e-shām hotā hai

bas ik nigāh pe hai dil kā faisla mauqūf

bas ik nigāh meñ qissa tamām hotā hai

jab apne ghar pe bulātā huuñ maiñ kabhī un ko

unheñ zarūr koī ḳhaas kaam hotā hai

javāb de nahīñ saktī zabān-e-shauq mirī

kuchh is adā se koī ham-kalām hotā hai

rah-e-junūñ meñ lipaTte haiñ paañv se kāñTe

ba-har qadam ye mirā ehtirām hotā hai

nazar nazar pe sar-e-bazm hai nazar un kī

nazar nazar meñ salām-o-payām hotā hai

'nasīr' ahl-e-vafā ke baḌe marātib haiñ

bahut buland vafā kā maqām hotā hai

ajib manzar-e-baala-e-baam hota hai

jab aashkar wo mah-e-tamam hota hai

hiras-e-shab, asar-e-zoaf, KHauf-e-rahzanan

musafiron pe giran waqt-e-sham hota hai

bas ek nigah pe hai dil ka faisla mauquf

bas ek nigah mein qissa tamam hota hai

jab apne ghar pe bulata hun main kabhi un ko

unhen zarur koi KHas kaam hota hai

jawab de nahin sakti zaban-e-shauq meri

kuchh is ada se koi ham-kalam hota hai

rah-e-junun mein lipaTte hain panw se kanTe

ba-har qadam ye mera ehtiram hota hai

nazar nazar pe sar-e-bazm hai nazar un ki

nazar nazar mein salam-o-payam hota hai

'nasir' ahl-e-wafa ke baDe maraatib hain

bahut buland wafa ka maqam hota hai