ajib sham thi jab lauT kar main ghar aaya

'ajīb shaam thī jab lauT kar maiñ ghar aayā

koī charāġh liye muntazir nazar aayā

du'ā ko haath uThā.e hī the ba-vaqt-e-sahar

ki ik sitārā mire haath par utar aayā

tamām 'umr tire ġham kī ābyārī kī

to shāḳh-e-jāñ meñ gul-e-tāza kā samar aayā

phir ek shaam dar-e-dil pe dastakeñ jāgīñ

aur ek ḳhvāb ke hamrāh nāma-bar aayā

gale se lag ke mire pūchhne lagā dariyā

kyuuñ apnī pyaas ko sahrā meñ chhoḌ kar aayā

ye kis dayār ke qisse sunā rahe ho 'naved'

ye kis hasīn kā āñkhoñ meñ ḳhvāb dar aayā

'ajib sham thi jab lauT kar main ghar aaya

koi charagh liye muntazir nazar aaya

du'a ko hath uThae hi the ba-waqt-e-sahar

ki ek sitara mere hath par utar aaya

tamam 'umr tere gham ki aabyari ki

to shaKH-e-jaan mein gul-e-taza ka samar aaya

phir ek sham dar-e-dil pe dastaken jagin

aur ek KHwab ke hamrah nama-bar aaya

gale se lag ke mere puchhne laga dariya

kyun apni pyas ko sahra mein chhoD kar aaya

ye kis dayar ke qisse suna rahe ho 'nawed'

ye kis hasin ka aankhon mein KHwab dar aaya