ajib shaKHs hai tewar hai baghiyana sa

ajiib shaḳhs hai tevar hai bāġhiyāna sā

banā.e rakhtā hai suulī pe āshiyāna sā

ajiib shauq hai shauq-e-visāl bhī us kā

gulāl chehra tabassum hai fātehāna sā

nigāh-e-nāz liye ḳhvāb ḳhvāb sūrat hai

har aadmī hai yahāñ gum-shuda fasāna sā

tasavvurāt ke but TūTte bikharte haiñ

har ik jumūd pe lagtā hai tāziyāna sā

taḌaptī machhlī kī āñkheñ phaḌak ga.ī sī haiñ

ġhazab kā saadh rahā hai koī nishāna sā

zamāna-sāz qalandar hai kis ḳhayāl meñ gum

aur us ke zer-e-qadam hai paḌā zamāna sā

jhukā.e rakhtī hai us ke kalām kī quvvat

libās Daal rakhā hai phaTā-purānā sā

kisī ne maut kī parchī pe likh diyā 'ulfat'

ye zindagī se ta.āruf hai ġhā.ebāna sā

ajib shaKHs hai tewar hai baghiyana sa

banae rakhta hai suli pe aashiyana sa

ajib shauq hai shauq-e-visal bhi us ka

gulal chehra tabassum hai fatehana sa

nigah-e-naz liye KHwab KHwab surat hai

har aadmi hai yahan gum-shuda fasana sa

tasawwuraat ke but TuTte bikharte hain

har ek jumud pe lagta hai taziyana sa

taDapti machhli ki aankhen phaDak gai si hain

ghazab ka sadh raha hai koi nishana sa

zamana-saz qalandar hai kis KHayal mein gum

aur us ke zer-e-qadam hai paDa zamana sa

jhukae rakhti hai us ke kalam ki quwwat

libas Dal rakha hai phaTa-purana sa

kisi ne maut ki parchi pe likh diya 'ulfat'

ye zindagi se taaruf hai ghaebana sa