akasr is tarah se bhi raat basar hoti hai

akasr is tarah se bhī raat basar hotī hai

raat kī raat nazar jānib-e-dar hotī hai

jis se duniyā-e-sukūñ zer-o-zabar hotī hai

vo mulāqāt sar-e-rāhguzar hotī hai

Thes lagtī hai jahāñ ishq kī ḳhuddārī ko

zindagī baḌh ke vahīñ sīna-sipar hotī hai

ye sapedī-e-sahar hai ki sitāroñ kā kafan

raat dam toḌ rahī hai ki sahar hotī hai

apne dāman se to maiñ poñchh rahā huuñ aañsū

dāman-e-dost kī tauhīn magar hotī hai

aap ārā.ish-e-gesū meñ lage haiñ nāhaq

fāteh-e-dil to mohabbat kī nazar hotī hai

rāsta roke hue kab se khaḌī hai duniyā

na idhar hotī hai zālim na udhar hotī hai

tū nazar bhar ke sar-e-bazm na dekh un ko 'nazīr'

is se rusvā.ī-e-tahzīb-e-nazar hotī hai

akasr is tarah se bhi raat basar hoti hai

raat ki raat nazar jaanib-e-dar hoti hai

jis se duniya-e-sukun zer-o-zabar hoti hai

wo mulaqat sar-e-rahguzar hoti hai

Thes lagti hai jahan ishq ki KHuddari ko

zindagi baDh ke wahin sina-sipar hoti hai

ye sapedi-e-sahar hai ki sitaron ka kafan

raat dam toD rahi hai ki sahar hoti hai

apne daman se to main ponchh raha hun aansu

daman-e-dost ki tauhin magar hoti hai

aap aaraish-e-gesu mein lage hain nahaq

fateh-e-dil to mohabbat ki nazar hoti hai

rasta roke hue kab se khaDi hai duniya

na idhar hoti hai zalim na udhar hoti hai

tu nazar bhar ke sar-e-bazm na dekh un ko 'nazir'

is se ruswai-e-tahzib-e-nazar hoti hai