aks-e-ranj-o-malal hain hum log

aks-e-ranj-o-malāl haiñ ham log

zindagī kā ma.aal haiñ ham log

gaah saada fasāna haiñ hamdam

gaah rañgīñ-ḳhayāl haiñ ham log

sāz-e-māzī rabāb-e-fardā kabhī

aur kabhī chang-e-hāl haiñ ham log

jis kā ab tak javāb ban na paḌā

ek aisā savāl haiñ ham log

dukh jhapaTte haiñ ham pe yuuñ jaise

ik ġhanīmat kā maal haiñ ham log

piite haiñ zahr-e-ashk jiite haiñ

azm-o-dam kā kamāl haiñ ham log

dahr ko jo atā kare mastī

haañ vahī mast-hāl haiñ ham log

tār-o-tīra ho bazm apnī kyoñ

sham.a-e-raushan-ḳhayāl haiñ ham log

hai matā-e-hayāt ġham terā

sāhab-e-jāh-o-māl haiñ ham log

ham se chamkegī bazm-e-fan har shab

māhtāb-e-kamāl haiñ ham log

ye ta.allī nahīñ hai sach 'shāġhil'

shā.irī kā kamāl haiñ ham log

aks-e-ranj-o-malal hain hum log

zindagi ka maal hain hum log

gah sada fasana hain hamdam

gah rangin-KHayal hain hum log

saz-e-mazi rabab-e-farda kabhi

aur kabhi chang-e-haal hain hum log

jis ka ab tak jawab ban na paDa

ek aisa sawal hain hum log

dukh jhapaTte hain hum pe yun jaise

ek ghanimat ka mal hain hum log

pite hain zahr-e-ashk jite hain

azm-o-dam ka kamal hain hum log

dahr ko jo ata kare masti

han wahi mast-haal hain hum log

tar-o-tira ho bazm apni kyon

shama-e-raushan-KHayal hain hum log

hai mata-e-hayat gham tera

sahab-e-jah-o-mal hain hum log

hum se chamkegi bazm-e-fan har shab

mahtab-e-kamal hain hum log

ye talli nahin hai sach 'shaghil'

shairi ka kamal hain hum log