aks ubhra na tha aaina-e-dil-dari ka

aks ubhrā na thā ā.īna-e-dil-dārī kā

hijr ne khīñch diyā dā.era zañgārī kā

naaz kartā thā tavālat pe ki vaqt-e-ruḳhsat

bhed saa.e pe khulā shaam kī ayyārī kā

jis qadar ḳharch kiye saañs huī arzānī

nirḳh girtā gayā rasm-o-rah-e-bāzārī kā

raat ne ḳhvāb se vābasta rifāqat ke evaz

rāsta band rakhā din kī numūdārī kā

aisā vīrān huā hai ki ḳhizāñ rotī hai

kal bahut shor thā jis baaġh meñ gul-kārī kā

be-sabab jama.a to kartā nahīñ tiir o tarkash

kuchh hadaf hogā zamāne kī sitamgārī kā

pā-ba-zanjīr kiyā thā mujhe āsānī ne

marhala ho na sakā tai kabhī dushvārī kā

mutma.in dil hai ajab bhiiḌ se ġham-ḳhvāroñ kī

silsila tuul pakaḌ le na ye bīmārī kā

aks ubhra na tha aaina-e-dil-dari ka

hijr ne khinch diya daera zangari ka

naz karta tha tawalat pe ki waqt-e-ruKHsat

bhed sae pe khula sham ki ayyari ka

jis qadar KHarch kiye sans hui arzani

nirKH girta gaya rasm-o-rah-e-bazari ka

raat ne KHwab se wabasta rifaqat ke ewaz

rasta band rakha din ki numudari ka

aisa viran hua hai ki KHizan roti hai

kal bahut shor tha jis bagh mein gul-kari ka

be-sabab jama to karta nahin tir o tarkash

kuchh hadaf hoga zamane ki sitamgari ka

pa-ba-zanjir kiya tha mujhe aasani ne

marhala ho na saka tai kabhi dushwari ka

mutmain dil hai ajab bhiD se gham-KHwaron ki

silsila tul pakaD le na ye bimari ka