aksar jue ke khel mein haari gai hun main

aksar jue ke khel meñ haarī ga.ī huuñ maiñ

ġhairat ke naam par bhī to maarī ga.ī huuñ maiñ

sayyād zevaroñ meñ jakaḌtā rahā mujhe

piñjre meñ Dālne ko sañvārī ga.ī huuñ maiñ

nā-karda gunāhoñ kī sazā bhog rahī huuñ

sho'loñ se ka.ī baar guzārī ga.ī huuñ maiñ

kyuuñ phir se ka.Tahre meñ bulāyā gayā mujhe

kyuuñ phir salīb par se utārī ga.ī huuñ maiñ

hai ruuh dāġh-dār mire ujle jism kī

lahje kī maar maar ke maarī ga.ī huuñ maiñ

phir se tumhārī yaad dilā.ī ga.ī mujhe

phir se usī galī se guzārī ga.ī huuñ maiñ

tanhā.iyāñ tumhārā patā pūchhne lagīñ

jis din se zindagī se tumhārī ga.ī huuñ maiñ

maiñ āsmāñ pe chāñd sitāroñ kī saf meñ thī

tere liye zamīñ pe utārī ga.ī huuñ maiñ

tum ne jo muskurā ke 'tabassum' kahā mujhe

tum par tumhāre naam pe vaarī ga.ī huuñ maiñ

aksar jue ke khel mein haari gai hun main

ghairat ke nam par bhi to mari gai hun main

sayyaad zewaron mein jakaDta raha mujhe

pinjre mein Dalne ko sanwari gai hun main

na-karda gunahon ki saza bhog rahi hun

sho'lon se kai bar guzari gai hun main

kyun phir se kaTahre mein bulaya gaya mujhe

kyun phir salib par se utari gai hun main

hai ruh dagh-dar mere ujle jism ki

lahje ki mar mar ke mari gai hun main

phir se tumhaari yaad dilai gai mujhe

phir se usi gali se guzari gai hun main

tanhaiyan tumhaara pata puchhne lagin

jis din se zindagi se tumhaari gai hun main

main aasman pe chand sitaron ki saf mein thi

tere liye zamin pe utari gai hun main

tum ne jo muskura ke 'tabassum' kaha mujhe

tum par tumhaare nam pe wari gai hun main