aksar zamin se uD ke falak par gaya hun main

aksar zamīñ se uḌ ke falak par gayā huuñ maiñ

mushkil thā ye kamāl magar kar gayā huuñ maiñ

maiñ jāntā thā hogī na mujh par nazar kabhī

mahfil meñ un kī phir bhī barābar gayā huuñ maiñ

patthar tarāsh kar ke to ishvar banā diyā

apne hī shāhkār se kyuuñ Dar gayā huuñ maiñ

raushan kiyā hai maiñ ne hamesha vafā kā naam

dār-o-rasan kī samt bhī aksar gayā huuñ maiñ

Tokā har ek gaam pe mere zamīr ne

jab bhī hudūd-e-shauq ke bāhar gayā huuñ maiñ

maqtal kā haal dekhā hai maiñ ne qarīb se

kūche meñ qātiloñ ke bhī aksar gayā huuñ maiñ

ehsās mujh ko itnā bhī ab to nahīñ 'navāb'

maiñ jī rahā huuñ aaj bhī ki mar gayā huuñ maiñ

aksar zamin se uD ke falak par gaya hun main

mushkil tha ye kamal magar kar gaya hun main

main jaanta tha hogi na mujh par nazar kabhi

mahfil mein un ki phir bhi barabar gaya hun main

patthar tarash kar ke to ishwar bana diya

apne hi shahkar se kyun Dar gaya hun main

raushan kiya hai main ne hamesha wafa ka nam

dar-o-rasan ki samt bhi aksar gaya hun main

Toka har ek gam pe mere zamir ne

jab bhi hudud-e-shauq ke bahar gaya hun main

maqtal ka haal dekha hai main ne qarib se

kuche mein qatilon ke bhi aksar gaya hun main

ehsas mujh ko itna bhi ab to nahin 'nawab'

main ji raha hun aaj bhi ki mar gaya hun main