alawa ek chubhan ke kya hai KHud se rabta mera

alāva ik chubhan ke kyā hai ḳhud se rābta merā

bikhar jaatā hai mujh meñ TuuT ke har ā.īna merā

ulajh ke mujh meñ apne-āp ko suljhā rahā hai jo

na jaane ḳhatm kar baiThe kahāñ par silsila merā

mujhe chakhte hī kho baiThā vo jannat apne ḳhvāboñ kī

bahut miltā huā thā zindagī se zā.iqa merā

maiñ kal aur aaj meñ haa.el koī nādīda vaqfa huuñ

mire ḳhvāboñ se naapā jā rahā hai fāsla merā

vo kaisā shahr thā mānūs bhī thā ajnabī bhī thā

ki jis kī ik galī meñ kho gayā mujh se patā merā

palaT aatā hai har din ghar kī jānib shaam Dhalte hī

kisī be-nām bastī se guzar ke rāstā merā

ye maiñ huuñ yā mirā saaya mirā saaya hai yā maiñ huuñ

ajab sī dhund meñ lipTā huā hai hāfiza merā

hañsī aa.ī thī apnī bebasī par ek din mujh ko

abhī tak gūñjtā hai mere andar qahqaha merā

alawa ek chubhan ke kya hai KHud se rabta mera

bikhar jata hai mujh mein TuT ke har aaina mera

ulajh ke mujh mein apne-ap ko suljha raha hai jo

na jaane KHatm kar baiThe kahan par silsila mera

mujhe chakhte hi kho baiTha wo jannat apne KHwabon ki

bahut milta hua tha zindagi se zaiqa mera

main kal aur aaj mein hael koi nadida waqfa hun

mere KHwabon se napa ja raha hai fasla mera

wo kaisa shahr tha manus bhi tha ajnabi bhi tha

ki jis ki ek gali mein kho gaya mujh se pata mera

palaT aata hai har din ghar ki jaanib sham Dhalte hi

kisi be-nam basti se guzar ke rasta mera

ye main hun ya mera saya mera saya hai ya main hun

ajab si dhund mein lipTa hua hai hafiza mera

hansi aai thi apni bebasi par ek din mujh ko

abhi tak gunjta hai mere andar qahqaha mera