alag alag tasiren in ki, ashkon ke jo dhaare hain

alag alag tāsīreñ in kii, ashkoñ ke jo dhāre haiñ

ishq meñ Tapkeñ to haiñ motī, nafrat meñ añgāre haiñ

tum se mil kar khil uThtā thaa, tum se chhūT ke phīkā huuñ

ai rañgrez mire chehre ke saare rañg tumhāre haiñ

garmī kī lū meñ tapne ke ba.ad hī paanī kā hai maza

tujh ko jītnā āsāñ thaa, ham jaan ke tujh ko haare haiñ

ai purvā.ī merī ḳhushbū us chaukhaT ke dam se hai

tū bhī guzar ke dekh jahāñ maiñ ne kuchh lamhe guzāre haiñ

muñh se batāo yā na batāo tum ham ko dil kī bāteñ

jān-e-man ye nain tumhāre, ye jāsūs hamāre haiñ

aisī baat milan meñ kab hogī jaisī is pal meñ hai

sab ke biich meñ maiñ huuñ, vo hai or ḳhāmosh ishāre haiñ

tere muñh par terī ham ne kabhī na kī tārīf zarā

likhne baiThe to kāġhaz par rakh diye chāñd sitāre haiñ

alag alag tasiren in ki, ashkon ke jo dhaare hain

ishq mein Tapken to hain moti, nafrat mein angare hain

tum se mil kar khil uThta tha, tum se chhuT ke phika hun

ai rangrez mere chehre ke sare rang tumhaare hain

garmi ki lu mein tapne ke baad hi pani ka hai maza

tujh ko jitna aasan tha, hum jaan ke tujh ko haare hain

ai purwai meri KHushbu us chaukhaT ke dam se hai

tu bhi guzar ke dekh jahan main ne kuchh lamhe guzare hain

munh se batao ya na batao tum hum ko dil ki baaten

jaan-e-man ye nain tumhaare, ye jasus hamare hain

aisi baat milan mein kab hogi jaisi is pal mein hai

sab ke bich mein main hun, wo hai or KHamosh ishaare hain

tere munh par teri hum ne kabhi na ki tarif zara

likhne baiThe to kaghaz par rakh diye chand sitare hain