alam ka bojh uThae safar mein rahta hai

alam kā bojh uThā.e safar meñ rahtā hai

jo bad-nasīb mirī chashm-e-tar meñ rahtā hai

vafā kī bhiik koī zar-parast kyā degā

kasīr fā.eda us kī nazar meñ rahtā hai

talāsh-e-rāhat-e-duniyā se kyā ġharaz mujh ko

amīn-e-ġham huuñ yahī mere ghar meñ rahtā hai

milī mujhe isī gardish meñ azm kī daulat

safīna merā hamesha bhañvar meñ rahtā hai

maiñ jāntā huuñ ki anjām-e-zindagī kyā hai

harīs uljhā huā māl-o-zar meñ rahtā hai

munāfiqat ke amal meñ kamāl hai itnā

vo kuchh na ho ke bhī aksar ḳhabar meñ rahtā hai

sadāqatoñ se muzayyan ḳhayāl hai 'sāhil'

mushāhida tire arz-e-hunar meñ rahtā hai

alam ka bojh uThae safar mein rahta hai

jo bad-nasib meri chashm-e-tar mein rahta hai

wafa ki bhik koi zar-parast kya dega

kasir faeda us ki nazar mein rahta hai

talash-e-rahat-e-duniya se kya gharaz mujh ko

amin-e-gham hun yahi mere ghar mein rahta hai

mili mujhe isi gardish mein azm ki daulat

safina mera hamesha bhanwar mein rahta hai

main jaanta hun ki anjam-e-zindagi kya hai

haris uljha hua mal-o-zar mein rahta hai

munafiqat ke amal mein kamal hai itna

wo kuchh na ho ke bhi aksar KHabar mein rahta hai

sadaqaton se muzayyan KHayal hai 'sahil'

mushahida tere arz-e-hunar mein rahta hai