allah re is gulshan-e-ijad ka aalam

allāh re is gulshan-e-ījād kā aalam

jo said kā aalam vahī sayyād kā aalam

uf rañg-e-ruḳh-e-bāni-e-bedād kā aalam

jaise kisī mazlūm kī fariyād kā aalam

pahroñ se dhaḌakne kī bhī aatī nahīñ āvāz

kyā jāniye kyā hai dil-e-nāshād kā aalam

mansūr to sar de ke subuk ho gayā lekin

jallād se pūchhe koī jallād kā aalam

maiñ aur tire hijr-e-musalsal kī shikāyat

terā hī to aalam hai terī yaad kā aalam

kyā jāniye kyā hai mirī merāj-e-maqāmī

aalam to hai sirf ik mirī uftād kā aalam

arbāb-e-chaman se nahīñ pūchho ye chaman se

kahte haiñ kise nik.hat-e-barbād kā aalam

kyuuñ ātish-e-gul mere nasheman ko jalā.e

tinkoñ meñ hai ḳhud barq-e-chaman-zād kā aalam

allah re is gulshan-e-ijad ka aalam

jo said ka aalam wahi sayyaad ka aalam

uf rang-e-ruKH-e-bani-e-bedad ka aalam

jaise kisi mazlum ki fariyaad ka aalam

pahron se dhaDakne ki bhi aati nahin aawaz

kya jaaniye kya hai dil-e-nashad ka aalam

mansur to sar de ke subuk ho gaya lekin

jallad se puchhe koi jallad ka aalam

main aur tere hijr-e-musalsal ki shikayat

tera hi to aalam hai teri yaad ka aalam

kya jaaniye kya hai meri meraj-e-maqami

aalam to hai sirf ek meri uftad ka aalam

arbab-e-chaman se nahin puchho ye chaman se

kahte hain kise nikhat-e-barbaad ka aalam

kyun aatish-e-gul mere nasheman ko jalae

tinkon mein hai KHud barq-e-chaman-zad ka aalam