amanat mohtasib ke ghar sharab-e-arghawan rakh di

amānat mohtasib ke ghar sharāb-e-arġhavāñ rakh dī

to ye samjho ki buniyād-e-ḳharābāt-e-muġhāñ rakh dī

kahūñ kyā pesh-e-zāhid kyuuñ sharāb-e-arġhavāñ rakh dī

mirī taufīq jo kuchh thī barā.e mehmāñ rakh dī

yahāñ tak to nibhāyā maiñ ne tark-e-mai-parastī ko

ki piine ko uThā lī aur liiñ añgḌā.iyāñ rakh dī

janāb-e-shaiḳh mai-ḳhāne meñ baiThe haiñ barahna-sar

ab un se kaun pūchhe aap ne pagḌī kahāñ rakh dī

tumheñ parvā na ho mujh ko to jins-e-dil kī parvā hai

kahāñ DhūñDūñ kahāñ pheñkī kahāñ dekhūñ kahāñ rakh dī

lagā leñge use ahl-e-vafā be-shubah āñkhoñ se

agar pā-e-adū par us ne ḳhāk-e-āstāñ rakh dī

idhar par noch kar Daalā qafas meñ uf re bedardī

udhar ik jaltī chingārī miyān-e-āshiyāñ rakh dī

zamīr us kā Dubo degā use āb-e-ḳhajālat meñ

vafādārī kī tohmat ġhair par kyuuñ bad-gumāñ rakh dī

havas mastī kī 'sā.il' ko nahīñ kaafī hai thoḌī sī

pyāle meñ agar pas-ḳhurda-e-pīr-e-muġhāñ rakh dī

amanat mohtasib ke ghar sharab-e-arghawan rakh di

to ye samjho ki buniyaad-e-KHarabaat-e-mughan rakh di

kahun kya pesh-e-zahid kyun sharab-e-arghawan rakh di

meri taufiq jo kuchh thi barae mehman rakh di

yahan tak to nibhaya main ne tark-e-mai-parasti ko

ki pine ko uTha li aur lin angDaiyan rakh di

janab-e-shaiKH mai-KHane mein baiThe hain barahna-sar

ab un se kaun puchhe aap ne pagDi kahan rakh di

tumhein parwa na ho mujh ko to jins-e-dil ki parwa hai

kahan DhunDun kahan phenki kahan dekhun kahan rakh di

laga lenge use ahl-e-wafa be-shubah aankhon se

agar pa-e-adu par us ne KHak-e-astan rakh di

idhar par noch kar Dala qafas mein uf re bedardi

udhar ek jalti chingari miyan-e-ashiyan rakh di

zamir us ka Dubo dega use aab-e-KHajalat mein

wafadari ki tohmat ghair par kyun bad-guman rakh di

hawas masti ki 'sail' ko nahin kafi hai thoDi si

pyale mein agar pas-KHurda-e-pir-e-mughan rakh di