amal kuchh aisa kiya adu ne ki ishq baham laga chhuDaya

amal kuchh aisā kiyā adū ne ki ishq bāham lagā chhuḌāyā

ilāhī chhuT jaa.eñ us kī nabzeñ milāp jis ne mirā chhuḌāyā

na baiThe ārām se vo gaahe uThā.e nit dukh pe dukh ḳhudāyā

ki jis ne nāhaq uThā ke bohtān apnā vaañ baiThnā chhuḌāyā

ilāhī mahrūm rakhiyo us ko mudām lazzāt-e-do-jahāñ se

asīr-e-dām-e-firāq kar mujh ko jis ne merā mazā chhuḌāyā

na dostī kā use mile phal na koī marbūt hove us se

ki jis ne kar dushmanī ḳhudāyā jo rabt aapas meñ thā chhuḌāyā

urūs-e-gītī samajh ke us ko zalīl hargiz na muñh lagāve

ilāhī aqd-e-mohabbat us se ye jis ne merā bañdhā chhuḌāyā

chhuTe garebān us kā gaahe na panjā-e-rañj se ḳhudāyā

ki dāman-e-vasl haath apne se jis ne us shoḳh kā chhuḌāyā

ilāhī zindān-e-ġham se paave na jīte-jī vo kabhī rihā.ī

ki jis ke bahkā.e se ab us ne dil apnā ham se phañsā chhuḌāyā

lahū jo mushtāq vasl kā thā chhuTā na qadmoñ se us ke hargiz

agarche dho dho ke us ne kitnā ba-shakl-e-rañg-e-hinā chhuḌāyā

kahe hai 'jur.at' yahī ba-takrār dard-e-hijrāñ se haath mal mal

ilāhī chhuT jaa.eñ us kī nabzeñ milāp jis ne mirā chhuḌāyā

amal kuchh aisa kiya adu ne ki ishq baham laga chhuDaya

ilahi chhuT jaen us ki nabzen milap jis ne mera chhuDaya

na baiThe aaram se wo gahe uThae nit dukh pe dukh KHudaya

ki jis ne nahaq uTha ke bohtan apna wan baiThna chhuDaya

ilahi mahrum rakhiyo us ko mudam lazzat-e-do-jahan se

asir-e-dam-e-firaq kar mujh ko jis ne mera maza chhuDaya

na dosti ka use mile phal na koi marbut howe us se

ki jis ne kar dushmani KHudaya jo rabt aapas mein tha chhuDaya

urus-e-giti samajh ke us ko zalil hargiz na munh lagawe

ilahi aqd-e-mohabbat us se ye jis ne mera bandha chhuDaya

chhuTe gareban us ka gahe na panja-e-ranj se KHudaya

ki daman-e-wasl hath apne se jis ne us shoKH ka chhuDaya

ilahi zindan-e-gham se pawe na jite-ji wo kabhi rihai

ki jis ke bahkae se ab us ne dil apna hum se phansa chhuDaya

lahu jo mushtaq wasl ka tha chhuTa na qadmon se us ke hargiz

agarche dho dho ke us ne kitna ba-shakl-e-rang-e-hina chhuDaya

kahe hai 'jurat' yahi ba-takrar dard-e-hijran se hath mal mal

ilahi chhuT jaen us ki nabzen milap jis ne mera chhuDaya