ana ne TuT ke kuchh faisla kiya hi nahin

anā ne TuuT ke kuchh faisla kiyā hī nahīñ

bayān apnā kabhī mudda.ā kiyā hī nahīñ

har ek shaḳhs ko insān hī rakhā ham ne

ki aadmī ko nazar meñ ḳhudā kiyā hī nahīñ

bas ek baar hī toḌā jahāñ ne ahd-e-vafā

kisī se ham ne phir ahd-e-vafā kiyā hī nahīñ

ka.ī dishāoñ se guzrā hai kārvān-e-hayāt

Thahar ke dil ko kahīñ mubtalā kiyā hī nahīñ

pahāḌ zulm-o-sitam ke hañsī meñ kaaT diye

adā-e-nāz ki koī gila kiyā hī nahīñ

chhuā jise bhī vahī lafz ban gayā tārīḳh

ki be-asar koī jumla adā kiyā hī nahīñ

tamām umr sañvārā ġhazal kī duniyā ko

ki 'ashk' ham ne kuchh is ke sivā kiyā hī nahīñ

ana ne TuT ke kuchh faisla kiya hi nahin

bayan apna kabhi muddaa kiya hi nahin

har ek shaKHs ko insan hi rakha hum ne

ki aadmi ko nazar mein KHuda kiya hi nahin

bas ek bar hi toDa jahan ne ahd-e-wafa

kisi se hum ne phir ahd-e-wafa kiya hi nahin

kai dishaon se guzra hai karwan-e-hayat

Thahar ke dil ko kahin mubtala kiya hi nahin

pahaD zulm-o-sitam ke hansi mein kaT diye

ada-e-naz ki koi gila kiya hi nahin

chhua jise bhi wahi lafz ban gaya tariKH

ki be-asar koi jumla ada kiya hi nahin

tamam umr sanwara ghazal ki duniya ko

ki 'ashk' hum ne kuchh is ke siwa kiya hi nahin